Bericht vom Fechten.
EIns mals gieng ich spazieren weit /
Ins ebne Feldt / vnd sah zur seidt /
Ein hübschen Jüngling her spatzieren /
Der fraget mich: Kan ich auch irrn:
Auff diesem Weg / da ich jetzt bin:
Da fieng ich an / vnd grüsset ihn:
Er dancket mir züchtiger massn /
Balt trat er zu mir an die strassn.
DA fragt ich ihn / wo er hin wolt /
Dasselb er mich berichten solt.
ER sprach: Ich wil hin an den Meyn /
Mich zu Franckfurt da lassen freyn.
Denn ich vor lengest hab begert /
Meister zu sein im langen Schwerdt.
Auch sunst in aller Fechter Wehrn /
Denn dadurch komm ich bald zu Ehrn,
DA sagt ich / Ja ihr geht hie recht /
Bleibt auff dem Weg / er ist gar schlecht /
Der wird euch bringen an den orth /
Da ihr hin wolt / geht immer forth.
Er fürt euch in die Stad hinein /
Welch ihr genandt / Franckfurt am Mayn.