die augen, oder umb den hals, und trehe ihn umb.
Einlauffen.
So du einem einlauffen wildt, das ich nicht fast lob, So du zu ihm kumpst, laß dein schwerdt fallen, greiff mitt deiner lincken hand in sein rechte, und greiff mit deiner rechten handt inwendig an sein recht beyn, und schlieff ihm under sein recht achsel, so hebstu und tregst ihn wo hin du wilt.
¶ Bruch.
Wann dir einer einlauffen wil, far ihm mitt deinem rechten arm über sein bede arm, und truck sie fast zu dir mit deinem arme, trit mit dem rechten fuß hinder seinen rechten, unnd wende dich auff dein lincke seitten, so fellt er.
¶ Einlauffen brechen.
Wann dir einer wil einlauffen, im schwerdt, laß dein rechte handt vom schwerdt, unnd begreiff sein rechte handt außwendig mit verkerter handt, und zuck ihn zu dir, Greiff mit deiner lincken handt an seinn elnpogen, und nim ihm das gewicht.
¶ Ein anders.
Laß dein handt vom schwerd, und mit der rechten handt fahr ihm über sein rechte hand, unnd truck damit nider, und mit der lincken handt nim ihm das gewicht bei seinem elnpogen.
¶ Schwerdt nemen.
So du sein schwerdt zu deinem begriffenn hast in dein lincke handt, und bleibt er nider mit den armen, so far mit dem knopff oben über sein schwerdt vor seiner rechten handt, unnd ruck auff dein rechte seitten, so bleiben dir beyde schwerdt.
