¶ Bruch diß vorgeschribenen.
Flügelt dir einer zu / versetz den ersten von tach Den andern steck von unden mit deiner langen schneid / und greiff mit deiner lincken handt an sein schwerts knopff / so würffestu ihn über sein schwerdt.
¶ Text.
Zornhaw / komp / twer /
Hat Schiler mit Scheytler /
Alber versetzt /
Nachraisen / Uberlauff / haw / letzt.
Durchwechsel / zuck /
Durchlauff / abscheid / hendtruck
Heng / wind mit plössen /
Schlag mach streych mit stößen.
Kron.
Tritt unnd schlag von oben mitt deiner langen schneid durch / auff sein linck ohr. Den andern trit un schlag mit kurtzer schneide oben nider des rechten ohrs. Den dritten streych hinder sich mit der langen schneid.
¶ Bruch.
Wann dir einer kron hawt / verfach den ersten. Zum anderenn streych / leg ihm dein kurtze schneid an hals / so schlegt er sich selb.
Feler.
Nim den Fehler auß dem Hohen ort / Haw kurtz durch / uff sein linck ohr / und tritt mitt deim lincken fuß gegen seiner rechten seitten / Und schlahe den andern streych lang hinein auff sein recht ohr / Bleib hoch mit guter versatzung.
¶ Bruch.
Haw von oben auß dem Ochsen gegen ihm / unden durch die Rosen / und leg ihm die kurtze schneid in sein gesicht / wind kurtz ab / und schlahe mit der langen schneid nach.