Von dem Brauch diser ⅹⅹⅲ. Stuck, volget hernach, und erstlich von dem Zornhaw.
Was auff dich würdt gericht,
Zornhaw ort das brich,
Wiltu ihn beschemen,
Am messer lerne abnemen.
So einer dir vonn der rechten seitten oben zum kopff schlegt, so haw von deiner rechten seitten auch von oben mit ihm gleich in sein messer, In des laß dein ort fürs gesicht odder brust schiessen, In des wend dein messer gegen dem seinen, das die lang schneid oben stehe, Würt er des orts gewar, so wind wider auff sein linck das ort zum gesicht, und haw von der andern seitten zum kopff. Magst auch darmit zur arbeyt Duplieren.
¶ Bruch zu dem Abnemen.
Wend dein messer mit dem ruckenn ein wenig auff das seine, und haw ihm oben nach der bloͤsse.
Oder trit beseitz auff den schlag, und arbeyt ihm zur rechten bloͤsse, mit dem haw. Odder stich ihm im Abnemmen zu dem gesicht.
Haw, Stich, merck,
In Band Weych oder Hert,
Vor und Nach, In des hab acht,
Die laͤuff des Kriegs recht betracht.
Mit dem kriege arbeit in weych und hert, nach der naͤchsten bloͤsse.
Den Krieg auff loͤß,
Oben, niden wart der Bloͤß.
Die wenden im messer, und die arbeit daraus, mit dem orte
