Henry de Sainct Didier

Henry de Sainct Didier
Born	1530s (?) Pertuis, Provence
Died	after 1584 Paris, France (?)
Occupation	Fencing master
Patron	Charles IX of France
Influences	Camillo Aggrippa Giacomo di Grassi (?)
Influenced	Salvator Fabris (?)
Genres	Fencing manual
Language	Middle French
Notable work(s)	Les secrets du premier livre sur l'espée seule (1573)
Translations	Traducción castellano
Signature

Henry de Sainct Didier, Esq. was a 16th century French fencing master. He was born to a noble family in Pertuis in the Provence region of France, son of Luc de Sainct Didier. Sainct Didier made his career in the French army, ultimately serving 25 years and seeing action in Piedmont, Italy from 1554 - 1555. He wrote of himself that he "lived his whole life learning to fight with the single sword" and eventually "reached a point of perfection" in his art. Apparently he became a fencing master of some renown, for in ca. 1573 he secured a royal privilege for a period of ten years for treatises on a number of weapons, including the dagger, single side sword, double side swords, sword and buckler, sword and cloak, sword and dagger, sword and shield (both rotella and targe), and greatsword. Unfortunately, only his treatise on the single side sword, titled Les secrets du premier livre sur l'espée seule ("Secrets of the Premier Book on the Single Sword") and printed on 4 June 1573, is known to survive; it seems likely that the others were never published at all.

Treatise

Preface

Illustrations	No Translation	Transcription by Olivier Dupuis
		TRAICTE CONTENANT LES SECRETS DU PREMIER LIVRE SUR L’ESPEE SEULE, Mère de toutes armes, Qui sont espée dague, cappe, targue, bouclier, rondelle, l’espée deux mains & les deux espées, avec ses pourtraictures, ayans les armes au poing pour se deffendre & offencer à un mesme temps des coups qu’on peut tirer, tant en assaillant qu’en deffendant, fort utile & profitable pour adextrer la noblesse, & suposts de Mars : redigé par art, ordre & pratique. Composé par Henry de Sainct Didier Gentilhomme Provençal. DEDIÉ À LÀ MAJESTE DU ROY TRESCHRESTIEN CHARLES NEUVIESME. À PARIS, Imprimé par Jean Mettayer, & Matthurin Challenge, & se vend chez Jean Dalier, sur le pont Sainct Michel, à l’enseigne de la Rose blanche, 1573. AVEC PRIVILEGE DU ROY.
		EPISTRE AU ROY. SIRE, Je ne m’amuseray à vous descrire combien sont à louer ceux qui taschans (comme l’on dit) ayder voire parfaire la nature, ont reduit les choses confuses en ordres, & de telle sorte que ce que de primeface sembloit rude, malaisé, & inaccessible, a esté par eux rendu aisé, traictable, & facile à aborder. Veu mesmement que le seul mal qui provient de la confusion & desordre des choses, et entre autres de celle qui sont propres aux Gentils-hommes les rendent assez recommandables. Parquoy tourneray ailleurs ma plume à vous remonstrer, que pour restaurer une bataille qui est en derroute, & la remettre en son pristin ordre, il est besoin à un chef avoir deux choses bien familieres. Assavoir le jugement, pour gaigner le temps & le lieu, où & quand il faut arrester les rancs rompus & par une fainte cargue amuser les ennemis, pendant que le reste des troupes se rassemble & reserre. Lequel jugement ne se peut acquerir, voire la raison d’iceluy ne se peut croire sans le second poinct que je dy au chef estre fort necessaire, qui est l’experience des choses, de laquelle naist le jugement susdit. (SIRE) quiconque veut remettre quelque art ou doctrine en son ordre ou la tirer de la confusion, de peur qu’en fin elle ne se gaste, il est requis qu’il soit fourny de jugement, nay de l’experience veue par lexercice dudit art, ce que je ne dy sans cause car ayant fait service au faict des armes, tant à voz ayeux, comme aussi à vostre Majesté, par l’espace de vingtcinq ans en Piedmont & ailleurs. Je me puis justement attribuer avoir usé ma vie à l’expérience desdites armes, tellement qu’une si longue preuve peut avoir en moy engendré quelque perfection de l’art & pratique d’icelles. De sorte que voyant combien confusément, & avec mauvais ordre elles ont esté & sont pour le jourd’huy par tout le monde monstrées, & pratiquées, ay en mon cerveau figuré quelque patron ou idée, suivant laquelle comme exemplaire, je me fay fort que l’ordre en sera non seulement bon, ains l’art qui y consiste sera du tout restauré, & atteindra plus prés sa perfection, lequel j’ay par longs jours, tant à cause de mon impuissance & extreme pauvreté (ennemie des bons esprits) comme aussi pour estre empesché à vostre service, tenu caché & ensevely parmy mes papiers en mon cabinet, où les Muses aprés les efforts martiaux m’ont fait, & espere que me feront compaignie. Mais maintenant le desir que j’ay de vous faire treshumble & tresagreable service, loinct le zelle que toute ma vie j’ay eu aux armes, & à ceux qui les aiment, & qui en font profession, n’ont peu permettre, qu’en ce temps (ou Mars nous donne quelque relasche) je ne me sois enhardy presenter à vostre Majesté, chose non digne d’un tel & si grand Monarque, mais fort propre pour l’exercice d’un commun père, tant des armes que de paix, scavoir, un traicté sur l’espée seule, mere de toutes armes, que j’ay composé suivant mon petit jugement, dans lequel sont contenus six poincts, par cy aprés declarez, avec un ordre, non encores jamais usité, & la preuve d’iceluy, tant par raison que par effait attaché au bout. Voyla (SIRE) que contiendra, à present ce petit œuvre, qui est comme un sommaire ou recueil du premier livre que j’ay encores par devers moy. Parquoy si vostre Majesté prent quelque goust à cestuy cy, Dieu me donnant la grace de vivre, j’espere par le moyen de vostredite Majesté en mettre par cy aprés d’autres en lumiere, Donc cestuy (qui est le premier & principal pour adextrer la noblesse) j’ay pensé digne de vous, qui estes le protecteur, & soustien des armes, desquelles il traicte, vous suppliant plusque treshumblement, là & quand il seroit reputé autre vous plaise prendre mon ardente affection, laquelle de long temps a esté dediée à vous offrir treshumble, & tresagreable service, en payement m’employant à quelque chose, qui concerne iceluy, & je me tiendray plus que tresheureux avec perpetuelle occasion & volonté, plus que grande de prier le souverain Recteur de l’univers vous donner treslongue, & tresheureuse vie. Et pour borne de vostre Empire la seule Mer Occeane.
		Vostre treshumble, & obeïssant serviteur, Henry de S. Didier, Gentilhomme Provençal.
		S’ensuivent les secrets de ceste espée seule, & de toutes les autres armes qui en dépendent, pour lesquels entendre, & sur tout mieux executer, six poinct sont requis. Le premier est combien de desmarches il y a en tout l’art desdites armes, & eslire la meillleure, & en donner raison.
		Le second, combien de gardes, & situations y a ausdittes armes & eslire la meilleure, & par quelle raison.
		Le troisiesme, de combien de coups l’ennemy aggresseur peut offencer le deffendeur & en donner pareille raison.
		Le quatriesme, en combien de lieux propres se peuvent adapter lesdits coups sur la personne, tant en assaillant, qu’en deffendant.
		Le cinquiesme, sçavoir, à tous ceux qui font, ou feront, cy aprés profession de monstrer audites armes : soy deffendre & offencer à un mesme temps de quelque coup ou coups qu’on peut tirer, & par ainsi s’ils ne les sçavent comment les pourront ils monstrer à leurs disciples.
		Par le sixiesme poinct, qui est le dernier on verra un grand secret, qui est de juger du coup que l’assaillant peut tirer sur le deffendeur & en sera donné raison.
		Quand au premier poinct, c’est à sçavoir combien il y a de desmarches, je respond qu’il n’y en aque deux, par ce que nous n’avons que deux pieds.
		Les aucuns se tiennent sur le pied droict, les autres sur le pied gauche, toutefois en donnent bien peu de raisons, soy tenant sur l’une ou sur l’autre desmarche. Mais pour estre bien asseuré quand il est besoing de mettre l’espée au poing, faut sçavoir laquelle desdites deux desmarches est la meilleure & la plus certaine & superlative & en icelle comme dit est se faut tenir pour executer ledit art.
		Quant à moy je soustiens avec l’esperience & preuve la desmarche qui se faict, soy tenant sur le pied gauche, pour la premiere foys, en mettant l’espée au poing, est la plus certaine & meilleure, tant pour l’assaillant que pour le deffendant. Combien que peu de noz encestres demonstrateurs s’y tiennent, & soy y tenant, tant sur l’un que sur l’autre, en donnent bien peu de raison. À ceste cause je concluray qu’il n’y a que deux desmarches en tout l’art, pour bien commencer iceluy.
		Et pour bien suivre les doctes, & les immiter, faut de deux choses bonnes choisir la meilleure, & de deux mauvaises, eviter les deux, si faire se peut, sinon la pire, & en ce faisant, je conseille à tous lesdits suppots de prendre la meilleure desdites deux desmarches, qui est celle qu’on se tient sur le pied gauche pour la premiere fois, en mettant les armes au poing, faisant un desdits trois desgainements.
		Sensuivent cy aprés les declarations & raisons desdits six poincts. La raison du premier est qu’il n’y a que deux desmarches, l’une se fait sur le pied droit, & l’autre sur le pied gauche.
		Quant à moy je dy soy tenant sur le pied gauche est le meilleur, par ce que y estant on a liberté de prendre plus de temps, & grande course, que sur la desmarche du pied droict & par consequent de bien assaillir, & de beaucoup mieux se deffendre, comme se verra cy aprés à l’ordre des coups.
		Voyla la raison pourquoy la desmarche qu’on faict sus ledit pied gauche, est meilleure que celle dudit pied droict.
		La seconde est sçavoir combien de gardes & situations il y a ausdites armes. Je dis qu’il n’y a que trois gardes, & trois assituations principalles. La premiere est la basse, assituant la pointe à la braye. La seconde est la moyenne, assituant la pointe de l’espée droit à l’œil gauche. La troisiesme est la haute, assituant la pointe de l’espée au visage, venant d’ault embas.
		Les aucuns demonstrateurs, quand ils definissent lesdites gardes, accommencent à la haute. Quant à moy, je commence à la basse, attendu que toutes choses se commencent aux fondements. Comme pour exemple, les gens doctes ne commencent à monstrer les sciences aux hautes, ne les maçons quand ils viennent à commencer à bastir les maisons, ne commencent pas à la tuille, ains au fondement. Et par ainsi je commence à la basse, qui est le fondement qu’on doit bien garder.
		Bien est vray, que de ceste garde basse, s’en peut engendrer deux autres basses, l’une est sur le costé droit, l’autre sur le costé gauche.
		Celle qui se fait sur le costé droit, elle se faict laissant la nature, & proprieté de leurditte mere, & participer sur le costé droict.
		Celle qui se fait sur le costé gauche, elle se fait aussi laissant la nature, & estre de saditte mere, & participer du costé gauche.
		Cesdites deux gardes engendrées de ladite basse, elle se font bien souvent pour attirer quelque coup des ignorans, qui fera un maindroict, ou un estoc haut ; car autre coup on ne peut, sur lesquels facilement on peut attraper & toucher l’ennemy assaillant qui sera estourdy, & ne considerera l’accident qui peut venir, estant sur sesdittes deux gardes faintes. Mais la garde basse leur mere est la plus certaine, de sorte qu’il n’y a que trois gardes, comme dit est.
		Le troisiesme poinct est qu’il faut scavoir de combien de coups l’ennemy assaillant peut offencer le deffendant. Quant à moy, je dy que l’assaillant & deffendant ne se peuvent offencer que de trois coups. Qui sont, Maindroict, Renvers, Estoc.
		Bien est vray qu’ils se peuvent multiplier en six lieux propres sur corps humain, qui faut bien garder, tout ainsi qu’un bon joueur de paulme faut qu’il garde bien l’es, que lesteu de partie adverse ne le touche. Aussi faut il qu’un bon tireur d’armes garde bien qu’un desdits trois coups ne touchent aux six lieux ausquels se peuvent adapter comme dit est, dont se verront cy apres.
		Faut noter que les armes, & la paulme sont cousins germains, & qui scaura bien jouer à la paulme, facilement & tost scaura bien tirer des armes.
		Le quatriesme poinct est, que l’assaillant & deffendant ne se peuvent offencer que desdicts trois coups : bien est vray qu’ils se peuvent multiplier, & adapter comme avons promis si dessus en six lieux propres sur la person ne, soit en assaillant, ou en deffendant, & qui scaura le moyen de soy deffendre, & offencer à un mesme temps, comme ce peult, desdicts trois coups, qui sont cy dessus & seront si aprés definis, estant multipliez il en scaura cent.
		Sensuivent les noms desdits six lieux propres, ou fault, & se peuvent tirer les susdicts trois coups, c’est à dire, Maindroict Renvers Estoc.
		Le premier coup & lieu, est un maindroict, de bas au jarret gauche du deffendant.
		Le second coup & lieu, est un renvers, de bas au jarret droict du deffendeur, s’il est droictié, & s’il est gauché, se fera au jarret gauche.
		Le troisieme lieu, ledict maindroict est multiplié une fois d’hault sur le costé gauche du deffendant.
		Le quatriesme lieu est un renvers d’hault sur l’espaulle droicte du deffendant, estans multiplié une fois.
		Le cinquiesme lieu, est le tetin gauche, auquel le Lieutenent assaillant tirera un estoc au Prevost, qui est ledict troisieme coup.
		Le sixiesme & dernier lieu, est le tetin droict dudict Prevost auquel le Lieutenent tirera un estoc, qui est ledict troisiesme coup, estant multiplié une fois comme ledict Maindroict, & Renvers.
		Fin desdicts six lieux, qui est aussi la fin du quatriesme poinct.
		Le cinquiesme est, qu’il fault sçavoir soy deffendre & offencer à un mesme temps desdits trois coups, adaptez & tirez aux susdits lieux, tant en assaillant qu’en deffendant observant bien le temps qui est requis. Dont le tout sera cy aprés monstré & declaré au long à l’instruction de ceste espée seule.
		Le sixiesme & et dernier poinct est un des bons qui soit requis de sçavoir en tout l’art, qui est juger du coup qui se peut tirer, tant en assaillant qu’en deffendant, car le jugeant facilement on y trouvera son remede, autrement non. Et pour ce faire faut regarder la pointe de l’espée, & ne la perdre jamais de veue, & en ce faisant, facilement on jugera du coup, le jugeant on trouvera moyen de soy deffendre & offencer, comme j’ay promis à un mesme temps.
		La raison pour juger d’un desdits coups est que l’exterieur, qui est ladite pointe de l’espée, se conduit & meine par l’interieur, qui est la volonté, & ne scauroit la pointe de l’espée, qui est l’exterieur, estre si habile que la veue, & par consequent la veue fait juger du coup, & gaigner le temps. La veue & le temps gaignées peuvent succeder & prealler ledit exterieur, qui est l’un desdits coups que le Lieutenant peut tirer sur le Prevost deffendant, & par là on peut trouver son remede.
		Voicy la fin & declaration du sixiesme & dernier poinct, qui est necessaire de scavoir à tous, pour l’intelligence de ceste arme, & de toutes les autres qui sont du mesme subjet. Suyvant les dessusdits six poincts, un nommé Fabrice & Jule, me vindrent une fois voir, avec quelques uns de leur païs, par ce qu’ils avoient ouy parler de moy, & leur avoit on dit que je composois un livre sus les armes & que je l’avois dedié au Roy. Eux cupides & volontaires, de sçavoir encores plus ausdites armes qu’ils ne sçavoient, me prierent de leur monstrer ledit livre, ce que je leur fis refus, (jusques à ce que ladite Majesté l’eust veu) & alors voyant leurs volontez bonnes, & qui n’estoient venus à moy pour eux jacter, ains pour tascher à voir le contenu dudit livre, cela m’esmeut de discourir avecques eux quelques poincts contenuz ausdites armes, & leurs fis certaines interrogations, qu’on pourra voir cy aprés avec leurs responses, par lesquelles on pourra facillement juger qui touche mieux au but de la vraye definition, & demonstration desdites armes.
		Et alors je me viens atacquer premierement audit Fabrice, & luy dis Seigneur Fabrice, avant que tirer à present avec vous, ny avec autre ausdites armes, je veux sçavoir de combien de coups l’ennemy assaillant peut offencer le deffendant. Et pourtant, de grace vous prie, le moy dire.
		Et alors respondit ledit Fabrice & dit, de plusieurs bottes, bottes en napollitain vaut autant à dire que coups en françois. Et encores oyant ledit Autheur cette response proferée par ledit Fabrice, estre infinie et incertaine. Respondit encore ledit Fabrice & dist seigneur pourquoy dictes vous que ma reponse est impertinente.
		Respond ledit de Sainct Didier & dit que toute response infinie n’a point de certitude, à ceste cause ladite response qu’a ledit Fabrice respondu de plusieurs bottes est impertinente.
		Et alors ledit Fabrice voyant que je remuois la teste, signifiant par là qu’il ne m’avoit respondu pertinement. Va ledit Fabrice un petit reprendre ses esprits, & feit autre response, & dit que de cinq bottes l’ennemy assaillant pouvoit offencer le deffendant : Et encores je luy dis definissez les, & à ceste heure il dit d’un, Maindrette, Renverse, Fendante, Estoccade, Imbronccade. Et oyant ceste responce proferée par ledit Fabrice, quand il dit cy dessus de cinq Bottes.
		Alors le dit Autheur, sans bien peu d’intervalle luy respondit & dit que telles responses contenoient deux chefs, par lesquels il avoit mal respondu, attendu qu’il y a une response qui est plurielle, & l’autre singuliere. La plurielle ne vaut rien, la raison est cy dessus donnée, la singuliere qui est quand il a dit cy dessus de cinq bottes n’est aussi pertinente. La raison par ce que il en y a trop & par ainsi en faut oster.
		Voyant ce, ledit Fabrice, que je dits qu’il falloit oster quelques coups desdites bottes, me repliqua pour scavoir de moy la vraye definition & secret, & me dit, Seigneur de S. Didier, pourquoy avez-vous dit que les responses, que je dy cy dessus, de plusieurs & de cinq bottes n’estoient par moy bien ne deuement respondues ?
		Respond derechef ledit Autheur, & dit que veritablement telles susdites responses ne valloient rien, au moins la plurielle, comme a esté definy cy dessus, & sera monstré cy aprés comme par exemple.
		Si on disoit & interrogoit un maistre de camp, & on luy demandast de combien d’advenues l’ennemy peut venir sur un camp, & qu’il respondit de plusieurs : Je dy que telle response seroit incertaine, & par consequent n’est pertinente, attendu que quand on fait telle susdittes interrogations à un maistre de camp ou autres, tels doivent estre certains de leurs responses. Autrement ne sont dignes de regir ne gouverner un camp, ne republiques, attendu qu’il faut estre certain de combien d’advenues l’ennemy peut venir sur un camp, à celle fin qu’on y puisse mettre autant de centinelles, pour la conservation & garde d’iceluy.
		Et pour respondre & conclure, à ce que dessus est dit nous avons autant de besoin de scavoir de combien de coups l’ennemy nous peut offenser, pour scavoir à iceux remedier & deffendre nostre corps & honneur, comme un Maistre de camps qui a un camp de cent ou cinquante mille hommes car c’est nostre interest particulier. Quant à moy je dis avec les doctes que ce qui ce peut faire avec peu est meilleur que ce qui ce fait avec beaucoup. À ceste cause j’osteray deux desdites cinq bottes que tient le dit Fabrice par ce que je les dy estre superflus, qui sont Fendant, & Imbronccade, & n’en demeurera plus que trois, qui sont cy dessus par moy definis, & seront cy apres.
		S’ensuit la declaration & raison cy aprés pourquoy ledit Autheur oste ledit Fendant, contre l’opinion desdits Fabrice & Julle, & plusieurs autres, ce neantmoins de tout temps les ont mis & mettent au ranc desdits coups. La raison pourquoy j’oste premierement ledit Fendant est par ce qu’il ne se peut faire proprement. Car tout Fendant qui est propre faut qu’il tienne & ne laisse le sommet & meillieu de la chose qu’on veut fendre. Or est il que je ne sache homme, tant soit il exercé en toutes sciences ou arts, qu’ayant une espée au poing, couttellats, ou autres armes à ce propres à fendre, que quelque coup qu’il puisse faire, ne participe ou d’un costé ou d’autre, laissant le meillieu. Et pourtant si tel coup tiré participe du costé droict, n’est Fendant, ains Maindroict, & s’il tient plus du costé gauche, n’est aussi Fendant, mais sera un Renvers.
		Voyla la raison pourquoy ledit Fendant est osté par ledit Autheur : du nombre desdites cinq bottes que tient le susdit Fabrice, & n’en demourera plus que quatre.
		Cy aprés est aussi declaré pourquoy ledit autheur oste ladite Imbronccade du nombre desdites cinq bottes. La raison, par ce qu’Estoccade & Imbronccade, c’est tout un, comme verjus verd, & verd verjus, c’est aussi tout un. Car en demandant l’un ou l’autre, on ne vous apportera jamais que le mesme. Aussi une Estoccade, & une Imbronccade, c’est une mesme chose, attendu que cest tousjours la pointe qui faict la faction. Et par ainsi ostant comme dit est, le Fendant & imbronccade, n’en demoureront plus que lesdits trois coups qui sont cy dessus declarez audit troisiesme poinct.
		Voicy la fin de tout ce qui est requis & necessaire de scavoir & entendre à un chacun, qui veut estre adroit ausdites armes Pour bien donner entendre lesdites armes, & discourir de l’art, ordre & pratique d’icelle, il a fallu feindre trois personnages : lLe premier c’est l’Autheur, le second le Lieutenant, le troisiesme le Prevost. Par l’Autheur sera descrit cy aprés tout l’ordre que doit tenir ledit Lieutenant & Prevost en l’art de ceste espée seule, laquelle s’ensuit cy aprés & le commencement d’icelle. FIN.
		Au Roy. Par Estienne de la Guette, gentilhomme. SIRE, il est tout certain que les hommes sont faits Et créés de nature ignares imparfaits, Grossier d’entendement & terrestres d’essence, Et que premierement ils n’avoient cognoissance, Comme nous au jourd’huy de tant d’arts merveilleux Usagez par le monde. Ains lourds & sommeilleux, Et poussez seulement d’un instinct de nature, Barbares n’avoient soing que de la nourriture, D’eux & de leurs enfans n’ayans autres maisons, Sinon les champs herbus, ou selon les saisons, Ores les fraix sejour des autres cois & ores. L’abry d’un chesne espars ne faisant souldre encores. En vigueur cest esprit ceste essence de feu Qui hault reside au chef, mais le temps peu à peu. Leurs dessillant les yeux les paupieres recloses, Leur fist premierement admirer maintes choses, En la terre & au ciel, & penser de plus prés À leurs commoditez leurs suscitant exprés Je ne scay quel desir, je ne scay quelle envie, De changer de façon & mener autre vie. Si qu’esveillé d’esprit & plus escort en fin Il planta de la vigne, & en cueillit du vin, Il semenca les champs, il creusa bas la terre, Et par force en tira les metaux & la pierre, Dont il flanqua des murs, & bastit des maisons : Les bestes il dompta, & des molles toisons, Des ouailles revestu d’un long fer imployable Se fist & affina une espée effroyable. Et projectant encor’ je ne scay quoy plus hault Il aisla ses esprits, & volant de plein sault, Jusques au plus haut des cieux ayant sur ordonnées, Aux courses du soleil, les courses des années : Des siecles & des jours soigneux y a cherché Le tresor de science aux hommes tant caché. Or mon Roy le plus grand, qui regnes sous les poles Je ne scay quel aspect de signes malevoles, Je ne scay quel malheur quel astre desastreux, Influoit aux Gaullois ce sort malencontreux Et rendoit tant d’esprits n’aguere en vostre France Assoupits & voillez d’une sotte ignorance, Que peu l’on en trouvoit qui ressentans en eux Un desir qui plus hault abhorrant desdaigneux, D’un vulgaire ignorant l’opinion peu caulte Entreprist hardiment quelque chose plus haute, Et digne de son nom, mais depuis que Francois, Vostre ayeul genereux, père des ars, aincois Des armes & des ars, & Henry vostre père Ce magnanime preux & Francois vostre frere. Et vous mon Prince & Roy dont l’illustre grandeur Cause & promet encor en la France tant d’heur Et voz freres aussi ces grands Princes nasquistes Lors ce commun malheur tellement vous vainquistes Par voz perfections ayans des dons des cieux Tout le meilleur en vous & comme demy dieux Des astres malveillans diverty l’influance Que depuis le haut ciel produit en abondance Non plus des lourds esprits avortez imparfaicts Mais nobles, & heureux, vifs, divins, & parfaits. Tant vous eustes pouvoir de commander aux signes Car comme un moulle vif de quelques roys insignes Applicqué sur la cire y grave son portrait Ainsi de voz esprits le moulle divin fait Et forme dans les cieux en tant d’esprits imprime Le portrait de vertu, & la marque sublime De voz heurs naturels, comme douans aux cieux Inviolable loy, de faire à qui mieux mieux Que noz esprits enclins jadis en choses basses Ensuivent de plus prés le parfait de voz graces. Car si comme il appert, en France on ne voit plus Tant d’espritz lourds, pesantz & reclus Sans plus aux sens communs : ains par experiences Cognoissent les secrets de mille arts & sciences Ne ceddans plus d’effaict comme jadis si plains, D’ignorance & bestise aux Arabes Romains, Egiptiens ou Grecs, & si ores plus qu’onques L’honneur & la vertu en manieres quelconques Y florit estimé, c’est mon Roy mon seigneur C’est la felicité, c’est le divin bonheur Que vous & vostre race, heureuse d’influances Et de vertu fatalle, avez en voz naissances Transmis du Ciel au monde, or entre tant de ceux Qu’en voz celebres noms, les favorables cieux Ont envoyé ça bas pour faire à la patrie Par quelques arts inventez cognoistre l’industrie Et grand vivacité de leurs divins espris Sire, un de sainct Didier seul emporte le pris Surpassant en honneur, en vertu & en gloire, Tous & tant d’inventeurs dont on face mémoire D’autant que son bel art qui cogneu ne fut oncq. Est bien plus excellent que les autres ne sont. Par les armes les grandeurs des Roys sont maintenues Les honneurs deffendus, les dames soustenues Par armes l’on acquiert, l’on garde liberté Par armes chacun vit en repis & seurté Par armes en tous lieux on voit punir le vice On voit garder les loix, & maintenir justice Et florir les citez, & regnes comme estans Necessaires par tout à chacun en tout temps. Or ce de sainct Didier, mon bon Roy & Prince Est seul & le premier, qui en vostre province, Voire de tout le monde a esté du dieu Mars Ravi jusques és cieux pour apprendre ses ars. Le maniement d’espée & l’adresse des armes Qui faict tant redoubter aux combats les gendarmes Pour les communiquer à vous premierement Qui de telles vertus estes seul l’ornement Puis s’ainsi le permet vostre altesse sacrée À chacun voz subjects qui l’ont tant ignorée Ignoré jusques icy vrayement a esté Sauf le meilleur avis de vostre Majesté. Des armes le bel art : car d’aucun tel pratique Tel ordre tels progrets, ny telle theorique, (Pour en un mesme temps deffendre & offencer Un superbe aggresseur qui se viendra lancer Furieux de sur nous) ne fut onc entendue Comme de sainct Didier, Sire, la pretendue. Monstrer en ce livret ou de faict tant soit grand, Le secret incogneu des armes il comprend. Le redigeant par art, non comme tant d’ignares Comme un tas de montreux ignorans & barbares L’ont traicté jusqu’icy (qui monstrant seullement À parer aux coups vains ou ruer follement Sans art sus l’adversaire un coup à l’aventure Qu’à nous offencer luy donnast ouverture) D’une faulce doctrine abusent ainsi ceux Qui ont desir d’aprendre & courent aprés eux Et de faict mon grand Roy ne voit on pas maints hommes Maints dispos courageux & adroict gentilshommes Qui seront de long-temps ensignez d’aucuns fouls Avec quelques apparance & ombre de beaux coups Rencontrer un lourdaut qui leur saillant grand erre, D’un vieux Malchus rouillé les rura bas par terre. Demeurant par ainsi un homme de cueur hault Honteusement vaincu par un simple rustault Faute mon jeune Roy d’avoir experience Des secrets liberaux de la belle science Que comme (un prophete) vollant entre les dieux, Ce sainct Didier a pris du sainct thresor des cieux Non que pour l’exalter je vueille tant medire, De tant d’autres qu’on voit que j’ose hardiment dire. Qu’aucun d’entre eux n’ayt eu quelque dexterité De faire avec l’espée un tour d’habileté, Car comme par les champs les mignardes avettes, Tirant je ne scay quoy des petites fleurettes, Avec une liqueur qui leur coulle du Ciel En forment par rayons leur doux suave miel, Ainsi ce sainct Didier recueillant de l’adresse Des ruses de jadis, & de quelque allegresse Du moderne estranger ou nature a faict Avec son scavoir propre un ouvrage parfaict : Que le destin fatal ni les vents ni la fouldre Ni tout semblable effort ne pourront mettre en pouldre, S’il peut estre agreable à vostre Majesté Mais que jamais si bien Escrimeur ayt traicté Comme on doit seurement à l’ennemy se joindre Qu’aucun de tout le monde ayt peu jamais attaindre Ceste perfection, Sire, il ne fust jamais Si non de cestuy seul & pour ce desormais Vostre France à bon droit se pourra vanter d’estre Sur toute autre province aux armes plus adextre, Et vous mon puissant Roy de Dieu tant favory, Le seul Prince soubs qui ils auront tant flory Et qui mieux en aurez, outre vostre justice Entretenu sur tous le tant noble exercice. Heureux certes de voir vostre accompli bon-heur S’acroistre du renom, encor de cet honneur. Soit donc Prince treshault vostre grandeur contente, Que vostre humble subject de sainct Didier presente À vostre Majesté & hault nom cilial Ce petit don d’esprit qu’avec tant de travail Tant de soin & labeur, il a pour satisfaire Au desir qu’il avoit tousjours de vous complaire Ourdi & compassé, qu’il le vous rend parfaict. Et vous noble de sang qui n’avez à souhait Sinon de conserver en bon heur vostre prince, Feaulx l’accompaignans par tout en sa province Faictes en le priant qu’il soit de luy permis, Que ce rare tresor en lumiere soit mis Et là vous instruez pour vostre Roy deffendre S’un jour l’on le vouloit à l’impourveu surprendre Lors qu’armez ne feriez contre ses apostez Sinon de glaives longs pendans à voz costez. Cependant mon grand Roy recevez je vous prie, Ce discours de mes vers qu’humble je vous dedie : Ensemble ce present, present digne de vous Pour le subject qu’il traicte & necessaire à tous.

Side Sword

Illustrations	No Translation	Transcription by Olivier Dupuis
		Sensuit cy aprés comment il se fault planter pour bien mettre l’espée au poing, tant en temps de paix qu’en temps de guerre, avec les desmarches, gardes, desgainements, & assituations requises en cest art, qui sont fort necessaires à ceux qui veulent exercer lesdites armes. Cy aprés quatre semelles mises & assituées au dessous des pieds du Lieutenent & Prevost, dont à l’une est cotté en chiffre 1, & à l’autre 2, & à l’autre 3, & l’autre 4, qui servent au Lieutenent & Prevost, & à tous autres, monstrans comment il faut bien & dextrement faires toutes les desmarches, desgainements, gardes, & assituations aux armes faignant un tel quadriangle, 1 2 4 3
		Tenue & plan general, pour faire la premiere desmarche & le premier, second, & tiers desgainements, qui sont necessaires scavoir, tant pour le Lieutenent assaillant, que pour le Prevost deffendant, & à tous autres qui aiment les armes, portans espée en leurs costez. Icy ensuit la declaration de ceste tenue & plan pour le Lieutenent. Et pour ce faire faut que cestuy premier Lieutenant soit à pied joinct, ainsi placé, tenant le pied gauche dans une semelle, où il y a cotté auprés en chiffre 1, & le pied droict dans l’autre semelle, où il y a auprés cotté en chiffre 2, tenant la main droicte à la garde de son espée, & la main gauche au fourreau de l’espée, monstrant par cela qu’il veut monstrer au Prevost comment il faut qu’il face par cy aprés : comme est monstré cy dessus à la pourtraicture dudit Lieutenent cotté en chiffre au derriere du chappeau 1. La fin de ce que doit faire à present ledit Lieutenent. La declaration du plan & tenue pour ledit Prevost. Et pour ce faire est besoin que ledit Prevost soit à pied joinct, tenant le pied gauche dans une semelle où est cotté au dessous icelle en chiffre 1, & le pied droict dans une autre semelle où est cotté au dessus en chiffre 2, tenant la main droicte à la garde de l’espée, & la main gauche au fourreau d’icelle, monstrant qu’il est prest à faire ce que est necessaire en ceste premiere desmarche, comme luy a monstré ledit Lieutenent, qui est le premier, second, & tiers desgainement, comme est cotté cy dessus à sa pourtraiture & figure en chiffre 2. Voyla la fin & declaration dudit premier plan pour ledit Prevost.
		Garde pour faire, & executer ladite premiere desmarche, premier & second desgainement, pour le Lieutenent & Prevost. Et pour faire ledit premier desgainement pour ce Lieutenent, est besoing qu’il soit à pied joinct, comme est monstré cy dessus à sa premiere pourtraiture, cotté en chiffre 1, & y estant, faut qu’il tire le pied droict arriere sur la semelle où est cotté au dessoubs d’icelle en chiffre 3, qui est pour la premiere desmarche. Et à un mesmes temps, mettre l’espée au poing, pour ledit premier desguainement portant la garde de l’espée aussi haut que l’espaule droite, assituant la pointe de l’espée droit le tetin gauche, contant 1, tenant la main gauche droict le visage, comme est monstré si dessus à la pourtraiture dudit Lieutenant, cotté en chiffre au derriere du col 3. Voyla la fin du premier desgainement pour ledit Lieutenent. Sensuit le second desgainement pour ledit Lieutenent. Pour le second desgainement pour ledict Lieutenent, faut qu’il soit ainsi placé à pied joinct, comme est monstré cy dessus, à la premiere pourtraiture, cotté en chiffre 1. Et pour executer cedit second desgainement est besoin, & faut qu’il tienne le pied droit un peu à quartier en l’air, l’ostant de la semelle où est cotté 2, portant la garde de l’espée, la desgainant aussi haute que l’espaule & la situation d’icelle comme dessus contant 1. Et à un instant passer l’espée par dessus la teste, estendant fort le bras, allant pauser ladicte garde de l’espée aussi haute que l’espaulle droitte, assituant la pointe de l’espée au tetin gauche du prevost, comme est cotté à sadite pourtraiture en chiffre 3. La fin du second desgainement pour ledit Lieutenent. Cy aprés est declaré le premier & second desgainement pour ledit Prevost, qui est pour scavoir bien mettre les armes au poing, comme luy monstre ledit Lieutenent. Et pour ce faire fault que ledit Prevost se souvienne comme il estoit placé cy dessus à sondit premier plan cotté en chiffre 2, qui est à pied joinct, & y estant, faut que cedit Prevost, pour faire cedit premier desgainement qu’il tire le pied droict qu’il a sur la semelle cottée 2, arriere sur la semelle où est cotté en chiffre 3, qui est aussi pour la premiere desmarche, & à un mesme temps mettre l’espée au poing, portant la garde de l’espée aussi hault, & un peu d’avantage que l’espaulle droict assituant la poincte de l’espée, estant sur ceste garde haulte, droit l’œil gauche, tenant sa main gauche droict son tetin gauche pour détourner la pointe de l’espée dudit Lieutenent, si par fortune la vouloit advancer davantage, comme est monstré cy dessus à sa pourtraiture cotté en chiffre 4. Voyla la fin de ce premier desgainement pour ledit Prevost. Sensuyt pour iceluy Prevost le second desgainement. Et pour bien executer le second desgainement, fault que ledit Prevost soit à pied joinct, comme est monstré a sadite pourtraiture, cotté en chiffre 2, & y estant, faut que cedit Prevost tire le pied droict hors de la semelle où il estoit, qui est cotté en chiffre 2, la posant un peu à cartier, faisant ledit second desgainement, qui est qu’il faut porter la garde de l’espée en garde moyenne, & la pointe droit le tetin gauche. Et pour commencer ce tiers desgainement, faut passer l’espée par dessus la teste, estendant bien fort le bras que tient icelle, & porter la garde de l’espée aussi haut, & un peu davantage que laditte espaulle droicte, assituant à un mesme temps la pointe de l’espée droict à l’œil gauche dudit Lieutenent, & la main gauche la tenant droict son tetin gauche, comme est dit cy dessus au premier desgainement, & comme est monstré à sadite pourtraiture cotté en chiffre au derriere du dos 4. La fin du premier & second desgaignement pour ledit Prevost. Aprés avoir monstré cy dessus, estant sur ledit premier plan, pour faire le premier & second desgainement pour le Lieutenent & Prevost, reste à monstrer le troisiesme desgainement, dont cy aprés on verra la garde & tenue pour executer & faire iceluy.
		Garde & tenue pour commencer à faire troisiesme desgainement pour le Lieutenent demonstrateur, au Prevost deffendeur. Ce troisiesme desgainement pour ce Lieutenent, il se fait estant à pied joinct, comme est dit cy dessus, & monstré audit plan general, tenant le pied gauche sur la semelle où est cotté au dessous en chiffre 1, & le pied droict à la semelle où est cotté 2, & pour bien commencer cedit troisiesme desgainement, faut que ledit Lieutenent oste le pied droict de ladite semelle, où est cotté 2, & la porter en avant en l’air, faisant le premier desgainement, voy en son lieu cy dessus, contant un, & tenant tousjours le pied en l’air, tournant la garde de l’espée, le dessus de la main en bas, & les ongles en haut, assituant la pointe de l’espée droict au ventre, tenant la main gauche derriere, comme est monstré cy dessus à sa pourtraiture cotté en chiffre au derriere du chappeau 5. La fin du commencement dudit troisiesme desgainement pour le Lieutenent. Le troisiesme desgainement pour ledit Prevost, il se commence & se faict estant à pied joinct, comme est monstré cy dessus au plan dudit Prevost, cotté en chiffre 2, tenant le pied gauche dans une semelle, où est cotté en chiffre auprés 1, & le pied droict dans une autre semelle où est cotté 2, & pour commencer & faire ledit troisiesme desgainement faut que le Prevost mette le pied droict qui est sur la semelle cotté 2 un peu à cartier en l’air. Et faisant le premier desgainement qu’a faict ledit Prevost cy dessus contant 1. Et pour parachever cedict desgainement fault tourner la main de l’espée les ongles en hault, contant 2, assituant la pointe de l’espée droit à la veue, tenant la main gauche derriere, comme est monstré cy dessus à sa pourtraiture & figure cotté en chiffre au derriere du bonnet 6. Voila la fin du commencement dudit troisiesme desgainement pour ledit Prevost.
		La fin du troisiesme desgainement pour le Lieutenent & Prevost, que voicy pourtraits & parachevez, reste à declarer cy dessous leurs proprietez & significations Pour bien, & avec grace parachever ledit troisiesme desgainement pour ce Lieutenent, faut estant sur le plan cy dessus pourtraict, où il tient le pied droict en avant en l’air ayant fait ledit premier & second desgainement, cotté en chiffre, 5, est besoin que ledit Lieutenent, pour parachever ce desgainement, qu’il pause ledit pied droict qu’avoit en l’air, sur la semelle où est cotté à ceste pourtraiture en chiffre 3, retournant la garde de l’espée le dessus de la main en haut, comme fait le Lieutenent où est cotté en chiffre 3, car le pourtrayeur a faict faute à cestuy cy. Mais cestuy Lieutenent icy tient bien sa main gauche, attendu qu’il la tient soubs le coude du bras de l’espée, comme est monstré à sa pourtraiture cotté en chiffre 7. La fin du parachevement dudit troisiesme desgaignement pour ledit Lieutenent. Et pour le parachevement dudit troisiesme desgainement pour ledit Prevost, faut aussi qu’il vienne à faindre estre sur le mesme plan cy dessus cotté 5, en chiffre à l’autre precedent Prevost, lequel tient le pied droict en l’air, tenant la garde de l’espée le dessus de la main en haut, & pour le parachevement de cedit troisiesme desgainement, faut que ledit prochain Prevost tire son pied droict arriere qu’avoit en l’air, comme est dit cy dessus, & le pauser sur la semelle où est cotté à sa pourtraiture en chiffre 3, tournant la main qui tient l’espée les ongles en bas, assituant la pointe de l’espée droict la face, ou l’œil gauche, qui est le mieux, & tenant la main gauche droict son espaulle, comme est monstré cy dessus à sa pourtraiture cotté en chiffre 8. Voyla la fin & parachevement dudit troisiesme desgainement pour ledit Prevost.
		Tenue generalle, tant pour le Lieutenent assaillant, que pour le Prevost deffendant, pour executer l’art, ordre & pratique contenu en ceste espée seule. Pour monstrer & declarer ceste tenue generalle pour le Lieutenent, est besoing, & faut à tous coups qu’il soit ainsi placé à pied joinct, ou à peu prés, tenant le pied gauche dans la semelle où est cotté en chiffre 1, & le pied droict dans une autre semelle où est cotté aussi en chiffre 2, tenant la main droicte à la garde l’espée, & la main gauche au fourreau d’icelle, monstrant au Prevost comment il doit faire, comme est monstré cy dessus à sa pourtraiture, cotté en chiffre 9. La fin de ceste tenue & plan pour ledit Lieutenent. S’ensuit le plan & tenue que faut que ledit Prevost deffendant fasse, estant instruit par ledit Lieutenent. Et pour ce faire faut pareillement, que ledit Prevost soit ainsi placé à pied joinct, tenant le pied gauche dans une semelle où est cotté en chiffre 1, & le pied droict en l’autre semelle, où est cotté en chiffre 2, tenant aussi son espée au costé gauche, & sa main droicte ouverte, monstrant par ce signe qu’il est prest à prendre l’espée, & faire ce que ledit Lieutenent luy dira, ledit Prevost tient aussi sa main gauche à son costé, signifiant qui la tient preste, & n’est gueres loin pour mettre l’espée au poing, & faire comme fait ledit Lieutenent cotté en chiffre 9, & cedit Prevost doit faire, & suivre tout ce qui est escrit icy, & comme est aussi escrit à sa pourtraiture, & figure cotté en chiffre 10. La fin de la tenue & plan pour ledit Prevost.
		Tenue & garde du premier coup de ceste espée seule, pour le Lieutenent, qui est un maindroit de bas au jarret du Prevost, tiré par le Lieutenent, & deffendu par le Prevost, comme se verra cy aprés au premier coup. Et pour ce faire le Lieutenent estant à pied joinct, comme est monstré cy dessus à la pourtraiture dudit Lieutenent cotté en chiffre 9, cedit Lieutenent tirera le pied droict arriere, un peu à cartier, en desgainant son espée, portera la garde d’icelle, en un mesme temps, aussi haute que son espaulle, assituant la pointe droit le tetin gauche du Prevost, tenant la main gauche au dessous du bras, comme est monstré cy dessus à sa pourtraiture cotté en chiffre au derriere du bonnet 11. Escrit pour la premiere garde & tenue pour ledit Prevost, pour commencer l’ordre de ceste espée seule. Et pour ce faire, faut que ledit Prevost soit à pied joinct comme est pourtrait cy dessus, cotté en chiffre 10. Et cedit Prevost ayant fait un desdits trois desgainemens, est demouré sur la garde haute, ayant tiré le pied droict arriere, tenant la main qui tient l’espée, un peu plus haute que l’espaulle droicte, assituant & visant la pointe de l’espée droict le menton, & tient ledit Prevost la main gauche droit son tetin, preste à faire ce que conviendra, & sera besoin cy aprés comme est monstré cy dessus à la pourtraiture & figure dudit Prevost cotté en chiffre au derriere du chappeau 12. La fin de ceste premiere garde pour ledit Prevost.
		Cette garde est presque semblable à la sudite, il n’y a guere de difference, & pourtant ne serviront que d’une, pour faire, & executer ledit premier coup de ceste espée seule, pour le Lieutenent & Prevost. Pour declarer ceste garde, pour ce Lieutenent, faut estant à pied joinct tirer le pied droit arriere un peu à cartier, portant la garde de l’espée aussi haute que l’espaulle droicte, assituant la pointe de l’espée droict à la gorge, la garde du Lieutenent cy dessus cotté en chifffre 11, est de mesmes, mais la situation non, par ce qu’il assitue la pointe de son espée droict le tetin gauche, & cestuy comme est dit à la gorge, tenant sa main gauche au desoubs le bras de l’espée, comme est monstré cy dessus à sa pourtraiture, cotté en chiffre, 13. Voyla la raison de ceste garde pour le Lieutenent. Cedit Prevost estant ainsi à pied joinct a tiré le pied droit arriere, & est demouré sur le pied gauche, ayant fait un desdits trois desgainements, & a porté la garde de l’espée un peu plus haut que l’espaulle droitte, tenant le dessus de la main que tient l’espée en haut, & les ongles en bas, comme il doit, & le dit Lieutenent ne fait, ainsi attendu que le peintre a fait faute à tous lesdits plus prochains Lieutenens, car ils devroient tenir les ongles de la main de l’espée en bas, & les tiennent en haut, mais cedit Prevost fait mieux que lesdits, & tient aussi sa main gauche au dessus du giron gauche, comme est monstré cy dessus à sa pourtraiture, cotté en chiffre 14. Voicy la fin de ceste seconde tenue, qui ne sert que d’une pour ledit Prevost deffendeur.
		Sensuyt le premier coup de ceste espée seule pour le Lieutenent assaillant, contre le Prevost deffendant. Et pour ce faire, faut que cedit prochain Lieutenent ayant fait la desmarche, & un desdits desgainemens, estant demouré sur le pied gauche, comme est sur la pourtraiture cy dessus cotté en chiffre 13, & pour faire & executer ce premier coup de ceste espée seule, ledit Lieutenent advancera le pied droit, estant sur ladite garde cotté 13, & tirera un maindroit de bas au jarret gauche du Prevost, haussant la garde de l’espée aussi haulte presque l’espaulle gauche, baissant bien la pointe de l’espée en bas, pour faire plus perfectement cedit maindroit au jarret, tenant la main gauche, comme est monstré cy dessus à la pourtraiture dudit Lieutenent cotté en chiffre 15. Voicy la fin du premier coup de ceste espée seule, pour le Lieutenent assaillant, contre le Prevost deffendant. Cy aprés est declaré comment le Prevost a deffendu son jarret, & a tiré un maindroit sur le bras du Lieutenent. Et pour ce faire, ledit Prevost estant sur le pied gauche, ayant fait un des trois desgainements, gardes & assituations, estant demouré sur la dite garde cotté en chiffre cy dessus 14, a ledit Prevost pour bien executer, deffendre, & offencer, à un mesme temps cedit maindroit de bas, tire son pied gauche arriere, & a tiré un maindroit sur le bras de l’espée dudit Lieutenent, & non comme ont fait aucuns demonstrateurs ignorans qui croisent l’espée contre espée, quand un coup vient de bas, cela est bon, car par là on se deffend : mais ce coup est meilleur, car par iceluy on se deffent, & si on offence, & par ainsi de deux choses bonnes, je vous conseille de prendre la meilleure, comme cedit Prevost tient aussi en executant cedit coup, tenant sa main gauche, comme est monstré à sa pourtraiture, cotté en chiffre, 16. Voila la deffence dudit maindroit de bas au jarret deffendu par le Prevost contre ledit Lieutenent.
		Sensuit la premiere opposite & suitte, du premier coup, qui est pour le Lieutenent assaillant, & pour le Prevost deffendant. Et pour ce faire, le Lieutenent, estant encores sur le pied droit, ayant tiré ledit maindroit de bas au jarret, le Prevost luy a tiré à un mesme temps un maindroit sur le bras de l’espée, comme est cotté cy dessus audit Lieutenent en chiffre 15, & au Prevost 16. Cedit Lieutenent estant encores sur le pied droit, se voyant frappé d’un maindroit sur le bras de l’espée, a incontinent monté & porté sont espée en haut, & tiré un arrieremain sur le costé de l’espaulle droite du Prevost, tenant ledit Lieutenent, sa main droite les ongles des doids regardant du costé gauche, & sa main gauche la tenant droit son visage, comme est monstré cy dessus à sa pourtraiture, cotté en chiffre au derriere de son col 17. La fin de la premiere opposite du premier coup de ceste espée seule, pour ledit Lieutenent. Cy aprés sera declaré la deffence de la premiere opposite & suitte pour le Prevost, contre ledit Lieutenent. Et pour evader & se garder de ceste premiere suitte, qui est un arrieremain d’haut, ayant tiré un maindroit sur le bras dudit Lieutenent, comme est monstré cy dessus à sa pourtraiture, cotté en chiffre dudit Lieutenent 15, & au Prevost qui execute ledit maindroit, cotté en chiffre 16, ledit Prevost estant sur le pied droit, pour se garder & deffendre de cestedite premiere opposite, croisera l’espée dudit Lieutenent, du fort le foible, luy presentant un estoc au visage dudit Lieutenent, tiendra ledit Prevost sa main gauche auprés de son tetin, comme est monstré cy dessus à sa pourtraiture, cotté en chiffre 18. La fin de la premiere opposite & suitte pour ledit Prevost, s’estant bien deffendu d’icelle, contre ledit Lieutenent.
		Sensuit la seconde opposite & suitte pour le Lieutenent & Prevost du premier coup de ceste espée seule, qui est un maindroit. Et pour bien faire & parachever ceste seconde suitte par ledit Lieutenent, faut qu’il soit encores sur le pied droit, & ayant fait la dite seconde opposite & suitte, ayant veu que ledit Prevost s’est deffendu, a ledit Lieutenent encores pour ceste seconde suitte desrobbé son espée par dessous la garde de l’espée du Prevost, & a tiré un maindroit d’hault sur ledit Prevost, tenant le dessus de la main que tient l’espée en bas, & les ongles en hault, & la main gauche droit son visage, comme est monstré cy dessus à sa pourtraiture & figure, cotté en chiffre 19. La fin de ceste seconde suitte dudit premier coup pour le Lieutenent. Cy aprés sera monstré comment le Prevost se doit deffendre de ladite seconde opposite & suitte, tirée par ledit Lieutenent assaillant. Et pour s’en bien garder, ledit Prevost doit regarder la pointe de l’espée dudit Lieutenent, & quand il l’a desrobbé par desous la garde de l’espée dudit Prevost, comme il doit, pour luy tirer un maindroit d’hault, ledit Prevost ne s’ostant sur la desmarche du pied droit, comme il est, croisera ledit maindroit que luy a tiré ledit Lieutenent du fort le foible, & luy presentera un estoc au visage dudit Lieutenent, tenant sa main gauche droit son espaule, comme est monstré cy dessus à sa pourtraiture & figure, cotté en chiffre, 20. Voici la fin de ceste seconde opposite & suitte de cedit premier coup pour ledit Prevost,
		En ces deux pourtraitures qui sensuivent est monstrée la garde & tenue pour faire le second coup pour le Lieutenent & Prevost, suivant l’ordre de ceste espée seule. Pour bien faire cestedite garde pour le Lieutenent faut qu’il soit à pied joinct, comme dit est cy dessus, à la tenue generalle dudit Lieutenent, où est cotté en chiffre 9, qui est pour monstrer comment faut faire toutes les gardes, qui sont requises à toutes les susdites armes. Et pour faire ceste garde icy pour ledit Lieutenent est besoin, estant ainsi placé comme dit est, qu’il tire le pied droict arriere un peu à cartier sus le costé droict, & à mesme temps mettre l’espée au poing, portant la garde de l’espée un peu plus haute que l’espaulle droicte qui est en garde haute, assituant la pointe de l’espée droict à la veue, tenant sa main gauche sus la cuisse gauche, comme est cotté en chiffre à sa pourtraiture 21. La fin de ceste garde pour ledit Lieutenent. Sensuit l’escrit de la garde & tenue pour ledit Prevost. Et pour ce faire ledit Prevost estant pareillement à pied joinct, comme est monstré cy dessus à sa pourtraiture cotté en chiffre 10, faut pour bien faire ceste garde basse que ledit Prevost tire le pied tire le pied droict arriere en desgainant portant la garde de l’espée sus son giron gauche, assituant la pointe de l’espée droict à la braye dudit Lieutenent, tenant aussi sa main gauche droict le tetin gauche, comme est monstré cy dessus à sa pourtraiture, & figure cotté en chiffre au derriere de son bonnet 22. La fin de ladite garde & tenue pour ledit Prevost.
		Sensuit le second coup de ceste espée seule, suivant l’ordre d’icelle, qui est un renvers de bas au jarret droict du Prevost, tiré par le Lieutenent, & deffendu proprement par le Prevost. Et pour ce faire, le Lieutenent estant sur le pied droict ayant faict & tiré ladite premiere & seconde opposite, & pour executer & faire cedit second coup advance le pied gauche, & tire un arriere main au jarret droict du Prevost, tenant la main gauche droict son visage, comme est monstré cy dessus à sa pourtraiture & figure cotté en chiffre 23. Voila la fin dudit second coup pour le Lieutenent. Cedit Lieutenent feint ne scavoir le remede de cedit renvers, mais il le fait comme ce verra cy aprés : car il ne se veult deffendre, ne faire le remede, attendu qu’il montre audit Prevost, comment il doit faire. Cy aprés sera declaré le second coup de ceste espée seule, pour ledit Prevost, qui est un renvers sur le coude de l’espée du Lieutenent. Et pour ce faire ledict Prevost ayant faict la premiere garde & desgainement estant sus le pied gauche pour executer ce coup quand ledit Lieutenent a advancé le pied gauche pour luy tirer un arrieremain de bas au jarret, le Prevost a tiré le pied droict arriere, & a tiré un renvers sur le coude du bras de l’espée dudit Lieutenent, & n’est allé à l’espée comme font un tas d’ignorans tenant la main gauche sur le giron gauche, comme est monstré cy dessus à sa portraiture & figure cotté en chiffre au derriere du col, 24. La fin du second coup qui est un renvers sus le coude du bras de l’espée dudit Lieutenent, tiré par cedict Prevost.
		Sensuivent les opposites & suittes, & declarations d’icelles dudit second coup, qui est un renvers de bas au jarret gauche du Prevost tiré par le Lieutenent. Et pour ce faire ledit Lieutenent estant sur le pied gauche, se voyant touché sur le coude du bras de son espée comme dit est aux autres susdites figures, cotté en chiffre, 23, & 24, incontinent se prochain Lieutenant a faict ceste premiere opposite, ou suitte, & est remonté d’un main droict, ou estoc d’haut, comme il pouvoit & a faict, tenant la garde de l’espée la pointe des doids regardant le costé gauche, & tenant la main gauche droict son epaulle, comme est monstré cy dessus à sa pourtraiture, cotté en chiffre 25. Voyla la fin de la premiere opposite dudit second coup pour le Lieutenent. Cy aprés sera monstré la declaration de la premiere opposite ou suitte dudit second coup, qui est un renvers de bas au jarret pour ledict Lieutenent, & un renvers sur le coude, tiré par ledict Prevost cotté en chiffre cy dessus, pour ledict Lieutenent 23. & pour ledict Prevost 24. Et pour se deffendre de ceste seconde opposite ou suitte, qui est un main droit ou estoc de hault tiré par ledict Lieutenent, est necessaire que ledict Prevost estant sur la demarche du pié gauche, il croise de son espée celle dudict Lieutenent, du fort le foible, & luy presenter un estoc au visaige dudit Lieutenent, tenant la garde de l’espée les ongles de la main d’icelle en hault, & la main gauche au dessoubs le coude du bras de l’espée, comme est monstré cy dessus à sa pourtraiture & figure cotté en chiffre 26. Voila la fin de la premiere opposite dudict second coup pour ledict Prevost.
		Declaration de la seconde opposite dudit second coup pour le Lieutenent & Prevost. Et pour ce faire faut & est besoin, que le Lieutenent susdict estant sus la démarche du pied droict desrobera son espée par desoubs la garde de l’espée du Prevost, & tirera encores un renvers ou estoc d’hault pour la seconde opposite & suitte à son chois sus le costé droict, tenant la garde de son espée ses ongles regardant du costé gauche, & la main gauche droict son visaige, comme est monstré cy dessus à sa portraiture cotté en chiffre, 27. La fin de la seconde opposite pour le Lieutenent provenante du second coup. Declaration de la seconde opposite pour le Prevost deffendant contre ledict Lieutenent. Et pour ce faire est besoing que ledict Prevost soit aussi sus le pied droict & qu’il croise & rabbate du fort le foible, l’espée dudit Lieutenent assaillant, qui est ceste seconde suitte, tenant la garde de l’espée & le bout des doids que tient icelle en bas, & luy presenter un estoc au tetin gauche, tenant aussi la main gauche droit le tetin gauche, comme est monstré cy dessus à sa pourtraiture & figure cotté en chiffre, 28, Voicy la fin de la seconde opposite pour le Prevost provenante du renvers de bas au jarret pour le Lieutenent, & deffendue & tiré sur le bras par le Prevost, comme est monstré tout au long aux portraitures cy dessus aux coups. Et si c’est qu’aucuns Lieutenens, ou Prevosts soient gauchiers, fault qu’ils observent la mesme dessusdite desmarche garde & assituations, s’ils veullent bien & parfaictement monstrer lesdites armes.
		Sensuit la garde & tenue du troisiesme coup, qui est un maindroit d’hault pour le Lieutenent assaillant contre le Prevost deffendant. Et pour ce faire est besoin que ledit Lieutenent aye fait une desdites desmarches & desgainement, & soit demouré sur le pied gauche, en garde basse, tenant la main de l’espée le trenchant en bas, & la pointe l’assituant un peu au dessus la braye du Prevost, tient aussi cedit Lieutenent la main gauche droict son menton, comme est monstré cy dessus à sa pourtraiture & figure, cotté en chiffre au derriere du chapeau 29. Fin de la garde & tenue pour ledit Lieutenent. Sensuit la garde & tenue dudit troisiesme coup pour ledit Prevost deffendeur. Et pour ce faire, faut que ledit Prevost soit aussi sur le pied gauche ayant fait ladite desmarche, & soit demouré sur le pied gauche en garde haute, tenant la garde de l’espée, le dessus de la main que tient icelle en haut, & que icelle espée soit plaine, tellement que un de y puisse demourer dessus, autrement telle garde seroit imperfaite, & fault qu’il assitue la pointe de l’espée droict l’oeil gauche, qui est la garde haulte & tient aussi sa main gauche droict son estomac, comme est monstré cy dessus à sa portraiture & figure cotté en chiffre 30. Voila la fin de la garde & tenue pour ledit Prevost pour executer & deffendre ledit troisiesme coup de ceste espée seule contre ledit Lieutenent.
		Le troisiesme coup de ceste espée seule pour le Lieutenent & Prevost est un maindroit d’hault suivant l’ordre des susdits lieux propres. Et pour ce faire, fault que ledit Lieutenent assaillant demonstrateur, comme avons dit en plusieurs lieux, estant comme dit est sur la desmarche du pied gauche, comme est cotté cy dessus à la pourtraiture dudit Lieutenent, non à ceste icy, mais aux autres, cotté en chiffre 29. Et pour cedit troisiesme coup, qui est un maindroit d’hault sur l’espaulle gauche dudit Prevost, faut que ledit Lieutenent advance le pied droit, & tirer un maindroit sur l’espaulle gauche dudit Prevost deffendeur, tenant le dessus de la main que tient l’espée en hault, & sa main gauche droit son menton : comme est monstré cy dessus à sa pourtraiture cotté en chiffre, 31. Si aprés est la declaration & deffence dudit troisiesme coup qui est un main-droit d’ault, tiré par ledit assaillant, & deffendu par ledit Prevost. Et pour ce faire est besoin que ledit Prevost soit sur la desmarche du pied gauche, ayant fait un desdits trois desgainements en garde haulte, telle qui est figuré audit Prevost deffendeur, marqué en chiffre 30. Et pour bien executer & deffendre audit Prevost cedit maindroit d’hault troisiesme coup, suivant l’ordre de la vraye demonstration de ceste espée seule, faut que ledit Prevost tire le pied gauche arriere, croise de son espée celle dudit lieutenent assaillant du fort le foible, c’est à dire d’auprés la garde de l’espée, un peu plus hault, & au milieu de l’espée dudit Lieutenent, tenant la main que tient l’espée, les ongles en hault, assituant & tirant un estoc droit le menton dudit Lieutenent, & tient sa main gauche droit son tetin comme est monstré cy dessus à sa pourtraiture, & figure, cotté en chiffre, 32. La fin dudit troisiesme coup pour ledit Prevost.
		Sensuit la premiere opposite & suitte pour le Lieutenent & Prevost, pour ledit troisiesme coup de l’espée seule. Pour bien faire ceste premiere oposite & suitte pour ledit troisiesme coup qui est un maindroit d’hault fault que ledit Lieutenent soit sus le pied droit ayant tiré ledit maindroit contre le Prevost, comme est cotté en sa figure & pourtraiture cy dessus en chiffre 31. Et à un mesme instant pour bien executer & faire ceste premiere opposite & suitte fault que ledit Lieutenent desrobe son espée en passant un avant-main par dessoubs la garde de l’espée du Prevost, & luy tirer un renvers ou bien arriere-main d’hault sur l’espaule gauche du Prevost, tenant les doids de la main de son espée vers le costé gauche & la main gauche droit le menton, pour rabbatre d’icelle la pointe de l’espée du Prevost, comme est monstré cy dessus en la figure dudit Lieutenent, cotté en chiffre, 33. La fin de l’opposite & suitte du troisiesme coup pour le Lieutenent. Sensuit la deffence de la premiere opposite & suitte dudit troisiesme coup pour le Prevost contre ledit Lieutenent. Et pour ce faire, faut que ledit prochain Prevost soit sur le pied droit. Et quant ledit Lieutenent desrobera & passera son espée par desoubs celle du Prevost pour luy tirer un arriere-main sur le costé droit de l’espée, le Prevost soy tenant ferme sur le pied droit pour deffendre ceste suite ledit Prevost croisera de son espée l’espée dudit Lieutenent assaillant, du fort le foible, comme est definy cy dessus en plusieurs lieux aux autres opposites & suittes, tenant la main que tient l’espée les ongles en bas, luy presentant un estoc à l’estomac dudit Lieutenent, & tient aussi sa main gauche droit son tetin, comme est monstré cy dessus à sa portraiture & figure cotté en chiffre 34. La fin de ceste premiere opposite dudit troisiesme coup pour le Prevost.
		Seconde opposite & suitte dudit troisiesme coup pour le Lieutenent & Prevost. Et pour bien faire ceste seconde opposite & suitte dudit troisiesme coup pour ledit Lieutenent, fault & est necessaire que ce present Lieutenent soit sur le pied droit, & estant l’espée dudit Lieutenent sur le renvers, en ceste mesme desmarche du pied droit, passera & desrobera son espée par desous la garde de l’espée du Prevost & tirera pour ceste seconde opposite & suitte un avant-main sur l’espaule gauche du Prevost, tenant la main que tient l’espée, les doids regardant vers le cotté gauche & la main gauche droit le visaige, comme est monstré cy dessus à sa pourtraiture cotté en chiffre 35. La fin de la seconde opposite & suitte dudit troisiesme coup pour ledit Lieutenent. Si aprés sera monstré & declaré la seconde & derniere opposite & suitte dudit troisiesme coup pour ledict Prevost. Et pour ce faire, fault que ledit Prevost soit sur la desmarche que dessus est dit, qui est sur le pied droit, & pour la deffence de ceste-dicte opposite ou suitte, faut que ledit Prevost croise l’espée dudit Lieutenent assaillant d’auprés la garde, un peu plus hault au milieu de l’espée dudit Lieutenent, qui est du fort le foible, tenant la garde de l’espée, & la main que tient icelle les ongles en hault, presentant un estoc au visaige dudit Lieutenent, & tient aussi ledit Prevost sa main gauche droit son tetin comme est monstré cy dessus à sadite pourtraiture cotté en chiffre au derriere du dos, 36. Voicy la fin de la seconde & derniere opposite dudit troisiesme coup, qui est un maindroit d’hault pour ledit Lieutenent cotté 33, & deffendue par cedit Prevost cotté 36.
		Sensuit la declaration, garde & tenue du quatriesme coup, qui est un renvers d’hault suivant l’ordre de ceste dicte espée seule pour le Lieutenent & Prevost, & de tout ce qu’il faut qu’ils fassent. Et pour ce faire, fault que ce present Lieutenent estant à pied joinct a faict un desdits deux desgainemens premiers susdits, & à cestuy icy s’est mis ledit Lieutenent sur le pied droict, pour monstrer la difference qu’a à l’endroit d’iceluy qui se fait sur le pied gauche, & tient cedit Lieutenent la garde de son espée sur le giron droit, en garde basse assituant la pointe de l’espée droit le giron du Prevost, tenant la main gauche vis à vis de son menton, comme est monstré cy dessus à sa pourtraiture & figure dudit Lieutenent, cotté en chiffre 37. Voila la fin de la tenue & garde pour le Lieutenent assaillant, qui est pour commencer à tirer le quatriesme coup. Sensuit aussi la raison de la pourtraiture, & tenue pour ledit Prevost deffendeur, qui est aprés avoir fait un desdits trois desgainements, est ledit Prevost demouré aussi sur la desmarche du pied droict, en garde moyenne, tenant la garde de l’espée droite, aussi haut que l’espaulle droite, assituant la pointe de l’espée au tetin gauche dudit Lieutenent, tenant sa main gauche droit son ventre, comme est monstré cy dessus à sa pourtraiture cotté en chiffre, 38. Voyla la fin de la garde pour ledit Lieutenent, pour tirer ledit quatriesme coup contre le Prevost.
		Cy aprés sera monstré & declaré le quatriesme coup de ceste espée seule, qui est un renvers d’hault, estant multiplié pour le Lieutenent assaillant, contre le Prevost deffendant. Et pour l’executer, faut que cedit Lieutenent, estant sur le pied droict avance le pied gauche, & tirer un renvers sur l’espaulle droicte du Prevost, ayant fait semblant de luy tirer un estoc au visage, tenant sa main gauche droict son menton, comme est monstré cy dessus à sa pourtraiture cotté en chiffre 39. Voyla la fin du quatriesme coup pour le Lieutenent. Aussi aprés est monstré la deffence dudit quatriesme coup pour le Prevost deffendeur, qui est un renvers d’hault, tiré par ledit Lieutenent agresseur. Et pour ce faire, faut que ledit Prevost estant sur le pied droict en garde moyenne, comme est cotté cy dessus à sa pourtraiture & figure en chiffre 38, faut qu’il tire le pied droict arriere, & croiser de son espée l’espée dudit Lieutenent, du fort le foible, sur ledit renvers, quatriesme coup tiré par ledit Lieutenent, tenant la main que tient l’espée les ongles en bas, & par consequent le dessus en haut, & presenter un estoc audit Lieutenent, tenant aussi sa main gauche droict son espaulle, comme est monstré cy dessus à sa pourtraiture cotté en chiffre au derriere du col 40. Voyla la fin dudit quatriesme coup pour ledit Prevost deffendeur.
		Sensuit la premiere opposite & suitte dudit quatriesme coup pour le Lieutenent assaillant, contre le Prevost deffendant. Et pour ce faire, faut que ce present Lieutenent soit, & demeure sur la mesme desmarche du pied gauche, & à un mesme instant qu’il aura tiré ledit renvers d’haut, desrobera son espée, par dessous celle du Prevost, & tirera pour la premiere opposite un maindroit d’hault sur ledit Prevost, estant comme dict est sur le pied gauche, tenant la main de l’espée les ongles en haut, & la main gauche droit sa poitrine, comme est monstré cy dessus à sa pourtraiture & figure, cotté en chiffre 40. La fin de la premiere opposite pour le Lieutenent demonstrateur. Icy aprés est monstré la deffence de la premiere opposite du quatriesme coup pour le Prevost, contre ledit Lieutenent. Et pour ce faire, faut & est besoing que ledit prochain Prevost soit sus la desmarche du pied gauche, & quand ledit Lieutenent luy tirera un maindroit d’hault, pour opposite est besoin que le Prevost croise & rabate à un mesme temps, & sans bien peu d’intervalle l’espée dudit Lieutenent, du fort le foible, tournant la garde de l’espée les ongles de la main que tient icelle, en haut, & presenter un estoc à la gorge, ou à la veue dudit Lieutenent, tenant la main gauche droict son tetin comme est monstré cy dessus à sa pourtraiture, cotté en chiffre 42. Voyla la deffence de la premiere opposite, provenant dudit quatriesme coup pour ledit Prevost.
		Sensuit cy aprés la seconde & derniere opposite dudit quatiresme coup, qui est un renvers d’hault, & sera aussi maintenant sur le pied gauche pour ceste opposite, pour ce present Lieutenent assaillant, & deffendue aussi par ce present Prevost. Et pour ce faire, faut que ce present Lieutenent, sans s’oster de la desmarche où il est à present planté, qui est sur le pied gauche, pour bien executer ceste seconde opposite, faut qu’il desrobe l’espée par dessoubs celle du Prevost, & tirer un renvers d’hault, comme son susdit coup propre, tenant le dessus de la main qui tient l’espée en hault, & la main gauche droict le menton, comme le tout est figuré cy dessus à sadite pourtraiture & figure, cotté en chiffre au derriere du bonnet 43. Aprés ayant declaré la seconde opposite par ledit Lieutenent assaillant. Reste à traiter & declarer ceste seconde opposite pour le Prevost deffendant. Et pour ce faire, faut que le Prevost soit sur le pied gauche & à un mesme temps sans bien peu d’intervalle aprés ayant tiré & deffendu ladite premiere opposite & suitte, qu’il retourne croiser & rabatre ceste seconde opposite que tire ledit Lieutenent sus un renvers d’hault, & faut que soit aussi du fort le foible, tenant les ongles de la main que tient l’espée en bas, & luy presenter un estoc à la gorge, tenant aussi sa main gauche au desous le bras de l’espée comme est monstré tout ce qui est dit à cedit prochain escrit à sadite pourtraiture & figure, cotté en chiffre 44. Voicy la fin de la deffence de la seconde opposite dudit quatriesme coup pour le Prevost.
		Sensuit la tenue & garde pour le Lieutenent assaillant, & pour le Prevost deffendant, pour executer, & tirer un estoc d’haut, pour le cinquiesme coup. Et pour ce faire, ce Lieutenent estant à pied joint comme est dit à un desdits premiers plans, fault pour bien faire ceste premiere garde basse, qu’il tire le pied droit arriere, en desgainant l’espée, & porter la garde d’icelle droit le giron gauche, le tranchant en bas, assituant la pointe droit la braye ou à peu-prés, tenant aussi sa main gauche droit son tetin comme est monstré cy dessus à la prochaine pourtraiture dudit Lieutenent, cotté en chiffre au derriere du haut de son collet 45. Voila la fin de la garde & tenue pour faire ledit cinquiesme coup de ceste espée seule, suivant l’ordre pour le Lieutenent. Si aprés est declaré la garde & tenue pour ledit prochain Prevost, pour soy deffendre dudit estoc cinquiesme coup tiré cy aprés par le Lieutenent. Et pour ce faire, cedit Prevost estant aussi à pied joint pour faire ceste susdite garde & tenue, faut qu’il tire le pied droit arriere, & face un desdits trois desgainemens, & porte la garde de l’espée un peu plus haut que l’espaulle droite, & soy mettant en garde haute, tenant la main que tient l’espée le dessus d’icelle en haut, assituant la pointe de l’espée à la bouche dudit Lieutenent, tenant aussi sa main gauche droit la poictrine comme est monstré & se peult voir cy dessus à sadite pourtraiture cotté en chiffre 46. Voici la fin de la tenue & garde pour ledit prochain Prevost, pour soy deffendre & garder dudit estoc, cinquiesme coup, que tirera cy aprés le Lieutenent assaillant.
		Sensuit le cinquiesme coup, qui est un estoc d’hault sur le maindroit, suivant l’ordre de ceste espée seule pour le Lieutenent assaillant, contre le Prevost deffendant. Et pour ce faire, faut que ce prochain Lieutenent estant sur le pied gauche comme est cotté cy dessus à l’autre pourtraiture en chiffre 45, advancer le pied droit, & tirer un estoc au tetin gauche du Prevost, tournant la garde de l’espée les ongles en hault, & la main gauche droit son visaige comme est monstré appertement tout ce que est dit par cest escript à sadicte pourtraiture, cotté en chiffre au derriere du sommet de sa teste 47. Voila le cinquiesme coup de ceste espée seule, tiré par ledit Lieutenent assaillant. Sensuyt la deffence dudit cinquiesme coup, qui est un estoc d’hault, participant du maindroit d’hault pour ledit Prevost deffendant, contre ledit Lieutenent assaillant. Et pour ce faire, faut que ledit Prevost estant sur le pied droit, tire le pied gauche arriere, & rabate & croise l’espée dudit Lieutenent de la sienne, du fort le foible, c’est à dire, d’auprés de la garde, au millieu, un peu plus haut vers la pointe de l’espée, les ongles en hault, presentant un estoc audit Lieutenent droit son visage, tenant ledit Prevost sa main gauche droit son tetin gauche, comme le tout est monstré cy dessus à sa pourtraiture & figure cotté en chiffre 48. Et si ledit Prevost est gaucher, faut que ledit Lieutenant droiturier luy tire cest estoc, advançant le pied droit arriere, & croisera l’espée dudit Lieutenent, du fort le foible, comme se pourra voir par exemple & praticque contre un gaucher. Bien est vray que si le Prevost est gaucher, ledit Lieutenent ou autre se doit adapter au Prevost gaucher à la demonstration, c’est à dire, qu’il se doit faire gaucher, & faire la desmarche premiere estant à pied joint, & tirer le pied gauche sur la semelle cotté aux premieres pourtraitures, 4, & laisser la semelle où est cotté, 1, vaccue comme se peult voir & en son lieu. La fin & declaration dudit cinquiesme coup, pour ledit Lieutenent & Prevost combien que l’un ou l’autre soit gaucher.
		Sensuit la premiere opposite & suitte dudit cinquiesme coup, qui est sur l’estoc d’hault, tiré par le Lieutenent assaillant, contre le Prevost deffendant que voicy. Et pour ce faire, faut que cedit Lieutenent estant sur la desmarche du pied droit pour faire ceste presente opposite & suitte un peu de temps aprés qu’il a eu tiré ledit estoc cinquiesme coup sur le maindroit, a ledit Lieutenent desrobé son espée par dessous la garde de l’espée du Prevost, & a tiré cedit present Lieutenent, pour la premiere opposite & suitte un autre sur le renvers, qui est sur le costé droit du Prevost, tenant la main gauche droit le tetin comme est monstré cy dessus à sa pourtraiture & figure, cotté en chiffre 49, Et si ledit Lieutenent est gaucher, faut qu’il tire les coups tout à l’opposite de ce qu’a esté tiré cy dessus, tant de la desmarche que ladite opposite & suitte, c’est à dire, que si ledit Lieutenent tiroit un renvers estant droiturier, faudroit que le Prevost s’il estoit gaucher le rabatit d’un maindroit de la main gauche. La fin de ceste opposite pour ledit Lieutenent. Si aprés sera declaré la deffence de ceste premiere opposite & suitte dudit cinquiesme coup pour ledit Prevost, contre ledit Lieutenent agresseur. Et pour ce faire, ledit Prevost estant aussi sur le pied droit, ledit Lieutenent voudra desrober son espée pour luy tirer ceste premiere opposite qui est un estoc d’hault sur le costé droit. Cedit Prevost voyant ce, estant sur ledit pied droit a croisé de son espée celle dudit Lieutenent du fort le foible, tenant la main que tient l’espée le dessus de la main en haut, & luy a presenté un estoc à la gorge, tenant la main gauche droit son tetin gauche comme est monstre cy dessus à sa pourtraiture & figure cotté en chiffre 50. Voyla la fin de cestedite opposite pour ledit Prevost.
		Sensuit la seconde opposite & suitte dudit cinquiesme coup de ceste espée seule, qui est un estoc d’hault pour le Lieutenent assaillant, & pour le Prevost deffendant. Pour declarer, & bien donner à entendre ceste dite seconde opposite & suitte pour ledit prochain Lieutenent, faut qu’iceluy soit sur la desmarche du pied droit, comme il estoit quand il a tiré ledit estoc cinquiesme coup d’hault, passant son espée en la desrobant sur un ariere-main par desoubs la garde de l’espée du Prevost, & à un instant ledit Lieutenent pour ceste seconde suitte tirera encores un estoc ou maindroit d’hault à son chois sur le costé gauche du Prevost deffendeur, tenant la main que tient l’espée le dessus d’icelle en bas, & les ongles en hault, & la main gauche la tenant droit son tetin comme est monstré cy dessus à sa pourtraiture & figure cotté en chiffre 51. La fin de la seconde opposite pour ledit Lieutenent. Si aprés est declaré la tuition & deffence de la seconde opposite dudit cinquiesme coup, de laquelle ce doit garder ledit plus prochain Prevost contre ledit Lieutenent. Et pour ce faire, est besoin que ledit Prevost, estant sur la desmarche du pied droit, croise & rabate l’espée dudit Lieutenent assaillant, du fort le foible, sur un maindroit autrement appellé avant-main, & par ce moyen deffendra & evitera ledit Prevost ladite seconde opposite & suitte, tirée cy dessus par ledit Lieutenent, & tout cela fait presentera ledit Prevost un estoc au visaige dudit Lieutenent, tenant la garde de son espée les ongles de la main que tient icelle en hault, & la main gauche droit le tetin gauche, comme est monstré cy dessus à sadite prochaine pourtraiture, cotté en chiffre au derriere de son chappeau 52. La fin de la seconde opposite & suitte dudit cinquiesme coup, qui est un estoc d’hault sur le maindroit, deffendu par ledit Prevost contre ledit Lieutenant demonstrateur.
		Voicy la garde & tenue du Lieutenent & Prevost pour l’estoc sixiesme coup, estant multiplié au sixiesme lieu propre sur le deffendeur. Faut declarer ceste garde & tenue prochaine, pour faire & executer l’estoc sixiesme & dernier coup & lieu, estant comme dit est multiplié en plusieurs coups & opposites de ceste espée seule cy dessus. Et à cestui cy est multiplié sur le costé droit. On le pourroit commencer à tirer sur le pied gauche, mais faudroit multiplier les coups, ou les executer avec une fainte. Mais à cestedite garde, pour commencer par ledit Lieutenent cedit sixiesme coup, il se tiendra sur le pied droit en garde moyenne, tenant le dessus de la main que tient l’espée en hault, assituant la pointe de l’espée droit la veue du Prevost, & la main gauche la tenant droit son menton, comme est monstré à sa pourtraiture cotté en chiffre au derriere du col 53. Fault noter que le gaucher pour bien deffendre cedit estoc d’hault, il est necessaire qu’il se tienne sur le pié gauche, & croiser l’espée du fort le foible, pour la defendre, comme se verra cy aprés aux coup qui ensuivent. La fin & declaration de la tenue & garde par cedit Lieutenent. Sensuit la declaration, de la garde & tenue pour ledit Prevost,pour se preparer à deffendre dudit estoc d’hault, qui sera tiré cy aprés par le Lieutenent contre le Prevost, au sixiesme & dernier coup, estant multiplié comme dit est au sixiesme lieu. Cestedite garde & tenue pour ledit Prevost est, qu’il faut estre sur le pied droict, comme ledit Lieutenent, combien qu’on se peut tenir sur le pied gauche, & avancer le pied droit, mais à ce dernier coup & lieu estant multiplié, nous traicterons de la garde qui se fait estant sur le pied droict. Pour ce faire, ledit Prevost sera sur le pied droict en garde basse, tenant la main que tient l’espée les ongles en bas, assituant la pointe de l’espée droit l’estomac dudit Lieutenent, & sa main gauche la tenant droit le tetin, comme on peut voir cy dessus à sa pourtraiture & figure, cotté en chiffre, auprés du panache de son bonnet 54. Fault noter que tous les gauchers qui ensuyvent l’instruction que je mets, tant pour le Lieutenent que Prevost facent la desmarche à l’opposite, & les desgainemens semblables, & les coups aussi à l’opposite d’iceux droicturiers, & se trouveront fort bien ceux qui tascheront à suyvre cesdictes raisons. Car l’experience leur fera trouver bonnes. Voila la fin de ladite tenue & garde pour le Prevost, pour soy deffendre du sixiesme coup, qui sera cy aprés tiré par le Lieutenent demonstrateur.
		Sensuit le sixiesme & dernier coup & lieu de ceste espée seule, estant multiplié, qui est un estoc d’hault sur le renvers tiré par le Lieutenent assaillant, contre le Prevost deffendant. Et pour ce faire, faut que ce prochain Lieutenent estant sur ladite garde, desmarche, que dessus est dit & monstré à sadite pourtraiture, cotté en chiffre 53. Cedit prochain Lieutenent estant sur le pied droit, comme il est dit, fera semblant de tirer un estoc au costé gauche du Prevost sur ledit pied droit, & à un instant advancera le pied gauche, desrobant son espée, par dessous la garde de l’espée du Prevost, & luy tirera un estoc au costé droit, tenant la garde de l’espée, & la main que tient icelle la pointe des doids regardant le costé gauche, & sa main gauche la tient droit son tetin gauche, comme est monstré cy dessus à sa portraiture cotté en chiffre au derriere du collet dudit Lieutenent 55. La fin & declaration de cedit sixiesme & dernier coup de ceste espée seulle pour le Lieutenent assaillant. Aprés ayant traité dudit sixiesme & dernier coup, de ceste espée seulle pour ledit Lieutenent assaillant. Reste à traiter aussi de la deffence d’iceluy pour le Prevost deffendant. Et pour ce faire, ledit Prevost estant sur le pied droit, comme est monstré à sadite pourtraiture estant en sa garde où est cotté en chiffre 54, le tirera arriere & croisera de son espée celle dudit Lieutenent assaillant, rabatant & deffendant ledit estoc du fort le foible, declarant encores qui est le fort le foible, c’est qu’il faut croiser tous coups d’auprés de la garde de l’espée au milieu de l’espée de l’ennemy, & voila du fort le foible, & ce fait ledit Prevost presentera un estoc à la poitrine dudit Lieutenent assaillant, tenant la main que tient l’espée le dessus d’icelle en haut, & la main gauche dessous le coude du bras que tient l’espée, comme est monstré cy dessus à sa pourtraiture cotté en chiffre, 56. La fin & declaration de la deffence dudit sixiesme & dernier coup pour ledit Prevost deffendant, contre ledit Lieutenent assaillant.
		Sensuit la premiere opposite & suitte dudit sixiesme & dernier coup, estant multiplié, qui est un estoc d’hault pour le Lieutenent assaillant, & deffendu par le Prevost que voicy. Icy est monstré par Henry de S. Didier auteur, comment cedit Lieutenent doit faire pour bien assaillir le Prevost, sur cedit dernier coup & lieu de cestedite espée seulle, suivant ledit art & ordre d’icelle. Et pour ce faire, cedit Lieutenent estant sur le pied gauche, ayant tire ledit sixiesme coup comme est monstré cy dessus à sa pourtraiture cotté en chiffre 55. Son espée estant sur l’arieremain, & pour bien faire & executer ceste premiere suitte, ce Lieutenent prochain desrobera son espée par desous la garde de l’espée du Prevost, & luy tirera un estoc sur le maindroit pour ceste premiere opposite, tournant la main que tient l’espée les ongles en haut, & sa main gauche droit son visaige, pour obvier à la pointe de l’espée du Prevost comme est monstré cy dessus à sa pourtraiture & figure cotté en chiffre au derriere du col dudit Lieutenent 57. La fin de la premiere opposite & suite de ce sixiesme coup & lieu pour ledit Lieutenent assaillant. Ici aprés est la deffence de ceste premiere opposite & suitte pour ledit Prevost dudit sixiesme coup, qui est un estoc d’hault estant comme dit est multiplié & tiré par ledit Lieutenent assaillant, & deffendu par le Prevost, comme sera veu par cest escript cy aprés dont ledit auteur le conduit & monstre, comme il se doit deffendre de cedit estoc. Et pour ce faire, ledit Prevost doit demourer ferme & stable sur la desmarche du pied gauche, & pour la deffence & conservation de cestedite opposite, qui sera un estoc le Prevost croisera de son espée, l’espée dudit Lieutenent du fort le foible venant du costé d’un maindroit, portant les ongles de la main que tient l’espée en haut presentant un estoc au visaige dudit Lieutenent, tenant aussi ledit Prevost sa main gauche droit le tetin gauche, comme est monstre cy dessus à sa pourtraiture cotté en chiffre 58. Voyla la fin & deffence de la premiere opposite & suitte du sixiesme & dernier coup, pour ledit Prevost deffendeur.
		Icy est la seconde & derniere opposite & suitte, dudit sixiesme coup, estant multiplié, qui est un estoc d’hault,sur le renvers, venant dudit estoc sur le maindroit pour le Lieutenent, contre le Prevost, dont la voicy executée. Et pour ce faire, faut que cedit prochain Lieutenent, estant sur le pied gauche, & son espée sur ladite premiere opposite, qui est sur le maindroit ou estoc d’icely, comme est monstré à sa pourtraiture cotté 57. Est besoing, & faut pour executer ceste seconde & derniere opposite, pour ce Lieutenent, qu’il desrobe son espée par dessoubs la garde de l’espée du Prevost, & tirer un autre estoc sur ledit arrieremain, tenant la main que tient l’espée le dessus en haut, & sa main gauche droite le visage, pour deffendre la pointe de l’espée du Prevost, si la poussoit plus avant, comme est monstré cy dessus à sa pourtraiture, cotté en chiffre au derriere du chappeau 59. Icy est la fin de ceste seconde & derniere opposite & suitte, pour le Lieutenent, assaillant, contre le Prevost deffendant. La deffence de ceste seconde opposite ou suitte, dudit sixiesme, & dernier coup de ceste espée seule, qui est un estoc d’hault, sur le renvers, pour le Prevost deffendant, contre ledit Lieutenent assaillant. Et pour la deffence de cestedite opposite & suitte, pour ledit Prevost, faut qu’il soit sur le pied gauche, & y estant doit croiser de son espée celle dudit Lieutenent, du fort le foible, qui est auprés de la garde, au milieu de l’espée comme a esté dit cy dessus en plusieurs lieux, & presente un estoc au tetin gauche, ou à l’oeil dudit Lieutenent, ayant la main que tient l’espée les ongles en bas, & la main gauche droit son estomac, qui est par dessous le coulde du bras, que tient l’espée comme est monstré en sa pourtraiture, cotté en chiffre au derriere du chapeau 60. Voicy la fin des six susdits coups, estans multipliez ausdits lieux propres, comme a esté dit cy dessus, avec ses opposites & suittes, tant pour ledit Lieutenent assaillant, que pour le Prevost deffendant.
		Icy est monstré la garde & tenue pour faire deux bons & subtils coups, en mainiere de triangle, & quadriangle, pour le Lieutenent assaillant, contre le Prevost deffendant. Et pour ce faire, ce present Lieutenent ayant faict un desdits trois desgainements, avec sa desmarche à ce propres est demouré sur le pied gauche lequel est planté & pausé sur la semelle du triangle où est cotté en chiffre 1 & est en garde moyenne, assituant la pointe de l’espée droit le tetin gauche du Prevost, tenant la main gauche sur le giron gauche comme est cotté cy dessus en chiffre à sa pourtraiture au derriere de son chapeau 61. Et s’il est gauché, faut qu’il tienne son pied droit sur ledit triangle, s’il veut bien executer & faire le principal coup, comme se verra cy aprés, & se tiendra en mesme garde, s’il est assaillant, comme est cotté en chiffre à cestedite pourtraiture dudit Lieutenent droictié 61. Voyla la fin, garde & tenue pour ledit Lieutenent, pour executer ledit triangle, contre le Prevost deffendant. Sensuit la declaration, garde & tenue dudit triangle, pour ledit Prevost deffendeur. Et pour ce faire, faut que le susdit prochain Prevost soit sur le pied gauche, tenant iceluy pied sur le coin du triangle, où est cotté en chiffre à sadite pourtraiture 1, ayant fait un desdits desgainements, avec la desmarche à ce propre, & est demouré cedit Prevost en garde haute, tenant le dessus de la main que tient l’espée en haut, assituant la pointe de l’espée droit l’oeil gauche dudit Lieutenent, & la main gauche droit son tetin, preste à destourner la pointe de l’espée dudit Lieutenent assaillant, comme est figuré cy dessus à sa pourtraiture, cotté en chiffre 62. La fin de la garde & tenue pour ledit Prevost deffendant.
		Sensuit comment il faut faire, pour executer un fort bon & subtil coup, faignant en terre un triangle par le Lieutenent assaillant, le voullant faire contre le Prevost deffendant, dont ont tous deux soubs leurs pieds le portrait & figure d’iceluy pour le bien faire. Et pour le bien commencer, ce Lieutenent advancera le pied droit qu’il tenoit arriere, à ladite pourtraiture cotté en chiffre 61, sur la semele où est auprés du coin du triangle où il y a cotté en chiffre 2, & tirer un estoc au visaige du Prevost, tenant la main que tient l’espée, les ongles en haut, & la main gauche, droit son visaige, comme est monstré apertement icy à ceste pourtraiture de ce Lieutenent cotté en chiffre 63. Voila comment doit tirer ledit Lieutenent un estoc qui servira d’espion pour commencer à faire cedit triangle. Sensuit comment le Prevost se doit deffendre dudit estoc, tiré par ledit Lieutenent sur une figure en manière de triangle. Et pour ce faire, ledit Prevost ayant fait ladite desmarche, garde, & assituation qu’a fait à sadite pourtraiture cotté en chiffre 62, a cedit Prevost tiré le pied gauche arriere, & l’a mis sur la semelle, où est ou doit estre cotté en chiffre 2, & a croisé cedit Prevost l’espée venant sur un estoc, tiré par ledit Lieutenent, du fort le foible, lequel est declaré en plusieurs lieux, tant desdits coups que aux opposites & suittes, tournant la main que tient l’espée, les ongles en haut, & presenter un estoc au visaige dudit Lieutenent, tenant sa main gauche droit & dessus la cuisse, comme est cy dessus à sa pourtraiture cotté en chiffre 64. Voila la fin & deffence du commencement & premier coup que tirera ledit Lieutenent contre ledit Prevost.
		Et pour la premiere opposite, & suitte dudit triangle, pour le Lieutenent assaillant, contre le Prevost deffendant, il se fait sur un estoc ou renvers d’hault, pour le Lieutenent. Pour bien faire ceste premiere opposite & suitte, pour ledit Lieutenent, faut ayant le pied gauche sur la semelle du triangle, où est cotté aux pourtraitures susdites en chiffre 1, advancer le pied droit sur la semelle où est cotté, ou doit estre 3, en chiffre, & passer la pointe de l’espée par dessous la garde de l’espée du Prevost, ayant fait & tiré le susdit coup, & tirer un estoc d’haut sur le costé droit du Prevost, pour ceste premiere opposite & suitte, tenant la main que tient l’espée les ongles en bas, & la main gauche droit le tetin, comme est monstré à sadite pourtraiture, cotté en chiffre, 65. La fin de la premiere opposite & suitte dudit triangle, pour le Lieutenent assaillant, contre le Prevost deffendant. Sensuit la deffence de la premiere opposite & suitte, pour ledit Prevost contre ledit Lieutenent. Et pour ce faire, faut que ledit Prevost regardant la pointe de l’espée dudit Lieutenent, quand elle passera par dessous la garde de son espée, pour luy tirer un estoc d’haut, ou renvers, au chois dudit Lieutenent, attendu qu’il est assaillant, & pour la conservation de ceste premiere opposite & suitte de cedit triangle, fait par le Lieutenent, est besoin que ledit Prevost croise l’espée dudit Lieutenent, du fort le foible, estant sur son pied droit, & presenter un estoc au visage dudit Lieutenent, tenant la main que tient l’espée le dessus d’icelle en haut, & la main gauche droit le tetin, comme est monstré cy dessus à sa pourtraiture, cotté en chiffre 66. Voila la fin & deffence de la premiere opposite dudit triangle pour ledit Prevost.
		Sensuit la seconde opposite, & suitte, qui est un estoc ou maindroit d’hault, provenant dudit coup du triangle pour le Lieutenent assaillant, contre le Prevost deffendant. Et encores cedit Lieutenent pour ceste seconde opposite dudit triangle, si ledit Lieutenent voit que ledit Prevost se soit deffendu de ceste susdite premiere opposite, faite & tirée sur l’arrieremain, comme est cotté audit Prevost en chiffre 66. & qu’il soit adroit. Ce present Lieutenent ayant demouré sur la mesme desmarche du pied droit desrobbera son espée, par dessous la garde de l’espée du Prevost, par un arrieremain, & fera semblant de tirer un arrieremain à la cuisse du Prevost, montant à un mesme instant son espée en haut, & pour executer ceste seconde opposite, croisera l’espée du Prevost du fort le foible, & luy presentera un estoc au corps ou au visaige, changeant le pied droit, qui estoit sus le coin du triangle, où est cotté en chiffre 3, & le mettre sur la semelle où est cotté 2, tenant la main de l’espée les ongles en haut & la main gauche droit le visaige, comme est monstré à sa pourtraiture au derriere du chappeau cotté en chiffre 67. Voila la fin pour le Lieutenent contre le Prevost. Sensuit le contraire de ceste seconde opposite & suitte pour ledit Prevost. Et pour ce faire, faut que ledit Prevost estant sur le pied gauche ayant fait sa desmarche, comme est dit cy dessus ausdites figures desdits trois desgainemens, cotté en chiffre 2, & 4 & comme est aussi monstré cy dessus à la pourtraiture dudit Prevost 62, & pour se bien garder de cedit coup tiré par ledit Lieutenent, en maniere & façon de triangle, est besoin que ledit Prevost regarde bien la pointe de l’espée dudit Lieutenent, & ne la perde jamais de veue & quand le Lieutenent susdit advancera son pied droit pour tirer un estoc ou renvers d’hault, faut que ledit prochain Prevost croise iceux coups, du fort le foible, & luy presenter un estoc au visaige, comme est monstré cy dessus à sadite pourtraiture cotté en chiffre 64, & pour faire & executer ceste seconde opposite, pour cedit Prevost, il sera sur le pied droit & croisera l’estoc venant sur le renvers qu’aura tiré ledit Lieutenent, du fort le foible, tenant la main que tient l’espée, les ongles en haut presentant un estoc au visaige dudit Lieutenent, & tiendra sa main gauche ledit Prevost droit la braye, comme est cotté cy dessus en chiffre 68. Voila la fin & deffence dudit coup, pour ledit Prevost.
		Tenue & garde du premier coup, pour executer & faire le quatriangle pour le Lieutenent & Prevost. Faut bien notter que pour faire & executer cedit quatriangle pour le Lieutenent, faut qu’il aye le pied gauche sur le coin dudit quatriangle, cotté en chiffre 1, ayant fait un desdits trois desgainemens, avec sa desmarche, & à ceste garde faut qu’elle soit moyennement basse, le trenchant de l’espée en bas, & la pointe de l’espée droit le ventre, tenant la main gauche droit l’estomac, comme est monstré cy dessus à sa pourtraiture, cotté en chiffre 69. Voila la fin garde & tenue pour ledit Lieutenent, pour commencer, faire & executer le quatriangle, contre le Prevost deffendant. Definition, garde & tenue pour ledit Prevost deffendant, pour se garder & deffendre dudit quatriangle tiré par ledit Lieutenent assaillant, contre le Prevost deffendant. Et pour ce faire, faut que ledit Prevost soit sur le pied gauche, dont iceluy pied sera mis sur la semelle, où est cotté en son quatriangle en chiffre 1, estant en garde moyenne ayant fait sa desmarche, desgainement que dessus est en plusieurs lieux dit, tenant la garde de l’espée le dessus de la main que tient icelle en haut, & par consequent les ongles d’icelle main en bas, & la main gauche sur son giron gauche, comme est monstré cy dessus à sa pourtraiture & figure, cotté en chiffre 70. Si aprés sera monstré un fort bon coup pour le Lieutenent assaillant, & pour le Prevost deffendant, en maniere de quatriangle & tout ce que y est requis scavoir par lesdits Lieutenens & Prevosts, & par consequent aux autres suppots.
		Premier coup & suitte du quatriangle, pour le Lieutenent & Prevost. Et pour le bien faire, est besoin pour le premier coup que le Lieutenent, ayant fait un desdits desgainements demoure sur le pied gauche, qui est sur la semelle cotté en chiffre 1, & pour executer ce coup faut que cedit Lieutenent advance le pied droit sur la semelle où est cotté en chiffre 2, & tirer un roide estoc d’hault, tenant la main que tient l’espée les ongles en haut, & la main gauche sur son giron droit, comme est monstré cy dessus à sa pourtraiture, cotté en chiffre au derriere du chapeau 71. Voila comment il faut que ledit Lieutenent commence à faire ce coup, en maniere de quatriangle, le feignant ainsi estre en terre. Sensuit comment il faut que ledit Prevost se deffende de ce coup, fait & tiré par ledit Lieutenent, faignant & figurant un quatriangle en terre, tel que cestuy cy dessus. Et pour ce faire, faut que ledit Prevost soit sur le pied gauche, comme est monstré & dit cy dessus à sa premiere tenue. Et pour bien deffendre cedit coup, fait comme dit est, en quatriangle, par ledit Lieutenent, sur un estoc ou maindroit d’haut. Ledit Prevost tirera ledit pied gauche, de la semelle dudit quatriangle, où est cotté en chiffre 1, & pausera le pied gauche sus un petit coin du triangle, où est cotté en chiffre 3, & croisera l’espée dudit Lieutenent, du fort le foible, detournant le maindroit ou estoc, tiré par ledit Lieutenent en quatriangle, comme dit est, presentant par ledit Prevost un estoc, droit l’oeil gauche dudit Lieutenent, & tiendra la main que tient l’espée les ongles en haut, & la main gauche droit sa braye, comme est monstré cy dessus à la portraiture dudit Prevost, cotté en chiffre 72. Voila ce que doit faire ledit Prevost, pour soy deffendre dudit quatriangle, tiré par ledit Lieutenent assaillant.
		Premiere opposite & suitte du quatriangle pour le Lieutenent & Prevost. Et pour continuer, faire executer ceste premiere opposite ou suitte dudit quatriangle pour le Lieutenent, est encores besoing qu’il face une suitte, voyant que ledit Prevost a esté adroit, & non ignorant, attendu qu’il s’est bien deffendu, à ceste cause doit ledit Lieutenent desrober son espée par desous la garde de l’espée du Prevost, & mettre le pied gauche sur la semelle où est cotté en chiffre 3. En passant un maindroit, tirant un peu le corps en arriere, & oster le pied droit du lieu où estoit cotté en chiffre 2. Et comme est monstré cy dessus à sa pourtraiture cotté en chiffre au derriere du chapeau 73. Voila que doit encores faire ledit Lieutenent, pour la premiere opposite, comme est requis en cedit coup de quatriangle. Sensuit la deffence de ceste premiere opposite & suitte, de cedit quatriangle pour ledit Prevost deffendant, contre le Lieutenent assaillant. Et pour ce faire, faut que ledit Prevost soit sur le pied gauche, sur le coin de son triangle, où est cotté en chiffre 1, & le pied droit sur la semelle où est cotté aussi en chiffre 2. Et pour la deffence de cestedite premiere suitte, estant ledit Prevost sur le pied droit, a croisé l’espée dudit Lieutenent, du fort le foible, & luy a presenté un estoc à son visage, tenant la main que tient l’espée le dessus d’icelle en haut, & la main gauche la tient droit le tetin, comme est monstré cy dessus à sa pourtraiture, & figure cotté en chiffre 74. Voila que doit faire ledit Prevost, pour se garder de cestedite opposite, qu’a tiré ledit Lieutenent jusques icy.
		Sensuit le parachevement dudit quatriangle, qui est sur un maindroit ou estoc d’hault, tiré par ledit Lieutenent, contre le Prevost. Pour bien parachever cedit quatriangle pour ledit Lieutenent contre le Prevost, faut que ledit Lieutenent, ayant le pied droit sur la semelle cotté en chiffre 4, & le pied gauche sur la semelle cotté 3, desrobera son espée par dessous la garde de l’espée du Prevost, & tirera un maindroit ou estoc d’haut, pour parachever ledit quatriangle, tenant ledit Lieutenent la main de l’espée les ongles en bas, & la main gauche droit son visage, comme est monstré cy dessus à sa pourtraiture, cotté en chiffre 75. Voicy le parachevement dudit coup, fait en façon de quatriangle, pour ledit Lieutenent, contre le Prevost deffendant. Sensuit la deffence & parachevement dudit coup, avec ses deux suittes, en facon de quatriangle pour ledit Prevost deffendant, contre ledit Lieutenent assaillant. Et pour ce faire, faut que ledit Prevost pour la premiere suitte, estant sur le pied droit, croise & rabate ledit renvers ou estoc d’hault tiré sur iceluy par ledit Lieutenent, du fort le foible, tenant la garde de l’espée les ongles de la main que tient icelle en bas, tirant un estoc d’hault, à l’oeil gauche dudit Lieutenent, comme est monstré cy dessus à sa pourtraiture & figure cotté en chiffre aux autres pourtraitures 74. Et pour ceste seconde opposite & suitte, qui est le parachevement de cedit quatriangle, ledit Prevost faut aussi qu’il soit sur le pied droit, & regarde bien la pointe de l’espée dudit Lieutenent, en tout le discours dudit quatriangle, & croise l’espée dudit Lieutenent faisant cestedite seconde opposite, qui est un maindroit ou estoc d’hault provenant d’iceluy du fort le foible, tenant la main que tient l’espée, les ongles en hault presentant audit Lieutenent un estoc à son visaige tenant la main gauche à son tetin, comme est monstré cy dessus à sa pourtraiture cotté en chiffre 76. La fin dudit quatriangle pour ledit Prevost. Aprés avoir traicté cy dessus de tout l’art, ordre & praticque de ladite espée seulle, & defini tout ce que y est requis, tant en assaillant que en deffendant, j’ay bien voulu cy aprés traicter & monstrer quatre fort bonnes & subtilles prinzes qui se peuvent faire, tant en assaillant que en deffendant comme se verra cy aprés à leurs pourtraitures.
		Cy aprés est monstré & declaré le plan, & tenue du Lieutenent assaillant, pour monstrer à faire la premiere prinse, contre le Prevost. Et pour ce faire, faut que cedit prochain Lieutenent soit sur le pied gauche, ayant fait comme dit est, sa desmarche, garde & assituation susdite, aux premiers plans, & à ceste cy faut qu’il se tienne sur le pied droit, en garde moyenne, tenant la main de l’espée les ongles en bas, & la main gauche droit le visage, pour estre plus prés à rabatre d’icelle un estoc d’haut, s’il advenoit que ledit Prevost, ou autre deffendeur luy tirast, car tous estocs sont aisez à deffendre, & à detourner de la main : mais qu’on ne les faille, attendu que la pointe est en l’air, & loin de la force dont elle procedde, qui est de son tireur. Et tout chose qui est en l’air est facille à detourner. comme il est prest à faire, s’il advenoit que le Prevost avançast sa pointe davantage, comme est monstré cy dessus à sa pourtraiture, cotté en chiffre au derriere du col 77. La fin de la garde & tenue pour ledit Lieutenent assaillant, lequel veut monstrer au Prevost à faire la premiere prinse. Sensuit la garde & tenue pour le Prevost, pour se deffendre de la premiere prinse contre ledit Lieutenent, comme ce verra cy aprés à la portraiture que s’ensuit en chiffre, 90. Et pour ceste garde, est requis que ledit Prevost aye fait mesme desmarche, garde & assituation, que dessus est dit, à un desdits desgainements, ayant tiré le pied droit arriere, & soit demouré sur le pied gauche, en garde haulte, tenant la main que tient son espée les ongles en bas, assituant la pointe d’icelle droit l’oeil gauche dudit Lieutenent, tenant aussi la main gauche droit son tetin, comme est monstré cy dessus à sadite pourtraiture cotté en chiffre au derriere de son chappeau 78. La fin de ladite garde & tenue pour ledit Prevost deffendant.
		En ces deux pourtraitures suivantes, est monstré le premier coup, qui est un maindroit ou estoc d’hault, tiré par le Lieutenent, contre le Prevost pour faire la premiere prinse de ceste espée seule. Et pour ce faire, cedit Lieutenent ayant fait sa desmarche, garde & assituation susdite, est demouré sur le pied gauche, & y estant pour executer ce coup, qui est un maindroit, ou estoc d’haut, cedit prochain Lieutenent a advancé le pied droit, & a tiré un maindroit ou estoc à son chois contre le Prevost, tenant la main que tient l’espée les ongles en haut, & la main gauche droit son nez, comme est monstré à sa pourtraiture cotté au derriere du col en chiffre 79. Voila la fin du coup que doit tirer ledit Lieutenent au Prevost pour faire la premiere prinse de ceste espée seule. Sensuit la tuition & deffence du premier coup pour le Prevost, pour se preparer à faire la premiere prinse que verrez cy aprés aux pourtraitures. Et pour ce faire, faut que ledit Prevost ayant aussi fait sa desmarche, desgainement, est demouré en garde haute, telle qui est figuré cy dessus à la portraiture dudit Prevost cotté en chiffre 78, estant sur le pied gauche, & pour se deffendre de cedit maindroit ou estoc d’haut que luy a tiré ledit Lieutenent, pour luy monstrer que la premiere prinse ce peut faire, & fait sur lesdits coups, cedit Prevost estant sur ledit pied gauche, a tiré le pied droit arriere & a croisé l’espée dudit Lieutenent, du fort le foible, haussant un peu la pointe de son espée en haut, & la main gauche droit le front du Lieutenent, tenant la main de l’espée les ongles en haut & la main gauche droit le tetin, comme est monstré cy dessus à sa pourtraiture cotté en chiffre au derriere du sommet de la teste 80. Voila la fin comment le Prevost a deffendu le coup susdit contre ledit Lieutenent. Par ces deux pourtraitures qui sensuivent, est monstré par le Lieutenent assaillant au Prevost deffendant, comment faut qu’il face & tous autres, la premiere prinse de ceste espée seulle, & en aprés luy sera monstré de contreprinses, de sorte, que quiconques observera tout ce que dit est, & ce qui sensuit cy aprés sans rien obmettre, il ne se trouvera jamais surprins ne offencé, & s’il se treuve, faudra qu’il confesse que n’est la faute de l’Auteur ne de l’art, ains la sienne, ayant commis la faute, de sorte que qui cognoit sa faute tel ce peult dire estre docte attendu que de soymesmes se pourra instruire & reprendre. Je vous advertis tous suppots de Mars que cedit art & sciences des armes n’ont esté redigé par l’Auteur pour en abuser, ains pour conserver vostre honneur & santé, car quiconque fera autrement la reigle ne faudra à l’Auteur ne à l’art, ains à celuy qui en abusera, & pourtant les sages dominent les astres & mauvaises volontez.

Copyright and License Summary

For further information, including transcription and translation notes, see the discussion page.

Work	Author(s)	Source	License
Illustrations
Translation
Transcription	Olivier Dupuis	FFAMHE

Additional Resources

• Hyatt, Robert Preston and Wilson, Devon. "The Single Sword of Henry de Sainct Didier." Masters of Medieval and Renaissance Martial Arts. Ed. Jeffrey Hull. Boulder, CO: Paladin Press, 2008. ISBN 978-1-58160-668-3
• Sainct Didier, Henry de. The Single Sword of Henry de Sainct-Didier (Traicté Contenant Les Secrets Du Premier Livre Sur L'Espée Seule). Trans. Robert Preston Hyatt and Devon Wilson. Boulder, CO: Paladin Press, 2009. ISBN 978-1581607048
• Slee, Chris. Secrets of the Sword Alone. LongEdge Press, 2014. ISBN 978-0646926353