Von eintheilung der vier Háuw / auch wie die mit jhren vmbstenden ins werck gericht / vnd gegen dem Mann gefochten sollen werden.
Cap. 4.
DIeweil an jhm selber nicht mehr dann vier Hauptháuw (wie nun offt gemelt) seind / vnd aber sich in diser eben so wol / als in bisher verrichten Wehren / vil andere mehr háuw zůtragen vnd gefochten werden / so wil ich dir gemelte vier háuw zů beiden seiten / auch hoch vnd nider nach außweisung der ob angezeigten Linien eintheilen / vnd damit du aller háuw ein grüntlichen bericht haben mógest / dich vnderweisen vnd lehren / wie solche vnderschiedlichen gegen des Mans leib hoch vnd nider angeschickt vnd volbracht sollen werden / vnd zům ersten so werden aus dem Oberhauw dreyerley háuw gemacht vnd genomen / vnder welchen dan der erste gerad von oben nider der mittelsten auffrechten Lini nach zům Kopff gehauwen / vnd schedelhauw oder hirnschlag genant wirt / Der ander aber wo du jm herab hauwen die hand verkerest also das du mit halber oder hinder schneide antriffst / wirt Schielhauw genant / Demnach wirt der dritte (so er jm herab hauwen zů den beiden seitten Lini / auff nach geschriebene art gefúhret wirt) Dempffhauw geheissen.
Weiter so wirt der ander Hauw auch nach außweisung der schlimen hangenden Lini / zů drey malen vnderschiedlichen hoch vnd nider gehauwen / vnder welchen der erste vnd óberste achselhauw vnd wehrstreich / der andere Húffthauw / der drit Schenckelhauw genant wirt.
Eben desgleichen wirt der Mittel oder vberzwerch hauw / auch zů dreien orten gegen des Mans leib durchfúhret / welche dann auch mit dreien vnderschiedlichen namen benamset / nemlich Halß / Gürtel vnd Fůßhauw / die vnderháuwe aber / werden eben durch die Lini vbersich
