You are not currently logged in. Are you accessing the unsecure (http) portal? Click here to switch to the secure portal. |
Page:Gründtliche Beschreibung der Kunst des Fechtens (Joachim Meÿer) 1570.pdf/51
hauwen bistu zůgleich auch wie du die Háuw abtragen solt / gelert vnd vnderricht worden / dises ob es wol mit den Háuwé wie jetzt gehórt / nit kann abgesondert werden / will doch von nóten sein / hie von insonderheit mit vnderschiedlicher theilung zůhandlen. Merck derwegen anfenglich das des Versetzens zweyerley ist / das erste ist da du ohn allen sondern vortheil / gemeniglich nur aus forcht versetzest / in welchem du nichts anders thůst / dann mit deinem Wehr / so du deinem gegenfechter entgegen heltst die streich die von im beschehen aufffahest / auch nit begerest ihn zů beschedigen / allein benüget an dem / wie du ohn schaden von jhm abziehen mógest.
Wenn du aber zů disem versetzen mit gewalt vnnd vbereilen getrungen wurdest / so sihe doch das du dich mit abtritten endtledigest / vnd mit vortheil zům Vor wider kommen mógest / Von dieser versatzung nun / thůt auch Lichtenawer meldung da er spricht.
Vor versetzen hüt dich /
Geschichts dir not es mühet dich.
Mit welchem er das versetzen darumb nit gar will verbieten / nemlich das du nichts anders dann zůhauwen lehren solt / dañ wie es dein schad / wie droben gehört / wann du dich auff das versetzen wolltest gewehnen / dieweil es an dem zůuil / so du zů versetzen gedrungen wurdest / Also ist es nicht nutz so du mit streichen vberbolderst / gleichfals auch hingegen vnbedacht gleichsam mit zůgethanen augen hinwider mit seinen streichen zůglich hinein Hauwen wolltest / welches dann keinem Fechten / sonder vil mehr einem vnbesunnenen Bawren getrösch gleichfórmig.
Aber vmb mehrer nutz willens / will ichs Hauwen vnd versetzen so mit einem streich geschicht alhie abtheilen / vnd dich lehren allein wie du solche Háuw zů versatzung brauchen solt / welches dann auch auff zweierley weiß mag beschehen / Erstlich da du deines gegenparts streich zůuor abtregst / oder mit einem Hauw abweisest / darnach wenn du im die vorwehr genommen / mit einem Hauw seinem leib zůeilest.