Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/73

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

theil also / schlecht er von deinem Schwerdt vmb zůr andern seiten / so reiß jhm nach mit dem Schnit auff sein Arm / truck jhn mit der sterck deiner klingen / oder mit deinem Schilt in einem ruck von dir / in dem er vom stoß noch dammelt / vnd sich noch nit erholet hat / so fahr in eil also mit gekreuzigten armen auff / vnd schlag jhn mit kurtzer schneidt vber seim rechten Arm auff sein Kopff / vnd solches wie bemelt ehe er sich vom stoß erholet / wo er sich aber erhielte vnnd zůr versatzung auffwischte / so laß dein Schwerdt wider abfliegen / vnnd zwirch mit einem abtrit deines lincken Fůß zů seinem Lincken ohr / oder wo er nit abgehet oder vmbschlecht / sonder bleibt mit dem Schnit oder Langer Schneid darauff / so verkehr dein Schwerdt das dein halb schneidan sein komme / riß jhm also sein Schwerdt auß auff dein Rechte seiten / in dessen aber laß in der lufft vmbschnappen / damit deine hende hohe vber dein haupt wider kreutzweiß zůsamen kommen / als dann schlag jhn wie vor / ehe er sich vom riß erholet mit kurtzer schneid auff sein Kopff / volgendt trit mit dem Lincken fůß zů ruck / vnd Hauw ein vberzwerchen Mittelhauw / mit Langer schneiden von deiner Rechten zů seinem halß / vnd in dem es glützt / so ziehe zů seiner Rechten mit hohen streichen ab. Also sihestu nun wie jmmer ein stuck nach dem andern / der gelegenheit vnd notturft nach muß gebraucht vnd zůsamen gesetzt werden / biß das ein gantz Fechtstuck gemacht werde. Hie merck aber letzlichen / das auch gantze stuck nur mit zweyen oder dreyen streichen können vollendt werden / als da du mit dem ersten streich in eil angreiffst / vnd mit dem andern wider abhauwest / vnd in disen streichen entweders mit dem ersten oder letzten triffst / mit welchen es am füglichsten mag beschehen / oder da du es mit dreien Háwen volfürest / mit dem ersten nemlich angreiffst / den andern nachfolgest / wenn aber / vnd zů welcher gelegner zeit solches muß beschehen / ist hie on not davon zů sagen / der Marck wie man spricht / wirt dich solches selbst wol leren / nach dem du alle andere Fechtstuck hierin begriffen mit fleiß erlernest.