Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/308

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

cher sein Wehr herbracht hat) durch sein gesicht / komme demnach behend wider von solcher vnder hůt (in welche du mit disem hauw ankommen bist) wider in die gerade versatzung.

Wie du dich gegen die vnderháuw mit nachhauwen halten solt.

ALso hauwet dir einer von vnden her / gegen welcher seiten das geschicht / so trit du in dem er her hauwet auff die ander / von seiner klingen beiseits aus zů jm / in solchem ausspringen aber falle mit vndersich ausgestreckter Wehr von Oben auff sein klingen / jhe neher zů seiner sterck jhe besser / also das du jhm Wehr noch vnderhalb deinem auffhaltest / demnach Hauwe behend (ehe dann er sein kling ferenr vbersich bringt) vberzwerch gegen seinem halß oder gesicht zů durch.

Wo du jhm aber seinen hauwe nicht auffhalten kanst / sonder er bricht mit seinem vnderhaw gegen deiner versatzung vbersich ganz durch / so bleibe du gleichwol mit deiner Wehr vndersich zůr seiten ausgestreckt / vor dir in der versatzung starck / also das er dich nicht schádigen kónne / vnd in dem er aber mit seiner Wehr jm vbersich fahren ist / so Hauwe jhm dieweil er seinen Arm noch in der hóhe hat / von vnden vberzwerch durch sein gesicht oder Brust ganz durch / diser hauw můß seinem vbersich durch brechen behend nach folgen / auff das du in von vnden triffst / ehe dann er seinen vnderhauw zů end bracht hat / vnd das so starck damit du nach ende solches hauwes / dein Wehr gegen der andern seiten zů der Achsel verschwungen habest / also das dein klingen nach dem verschwingen hinder dir abhange / von dannen hauwe behend zwen schlimme Zornháuw durch das ober kreutz nach.