din haupt vnd loß din klingen hinten vber din rueck nider hangen vnd lauff mit dem haupt durch die arm siner rechten siten vnd spring mit dem rechten fus hinter sinen rechten vnd mit dem sprung far im mit dem rechten arm siner lincken siten woll vmb den liebt vnd fas In also vff din rechte huff vnd wurff In vor dich nider auff sin kopff ~
Item ein andern ringen
wan er dir In laufft mit gestrackten armen vnd du Im wider so lauff im durch mit dem hauptt zu diner rechten siten vnd schritt mit dinen rechten fus vornen fur sin rechten vnd far im mit dem rechten arm vnter sin rechten durch hinden vmb sinen lieb vnd senck dich In vnd fas In vff die rechten huff vnd wurff In hinder dich dÿ zu ringen soltu triben zu beiden sitenn ~
Item eyn ander ringen
wan er dir In laufft zu diner rechten vnd ist hoch mit den armen vnd du auch so halt din schwertt zu diner hant vnd stos do mit sinen arm von dir vnd spring mit dinem lincken fus vorn fur sinen rechten vnd far im mit dem lincken arm wol hinten vmb den lieb vnd senck dich eyn wenig nider vnd fas In vff din lincke hueff vnd würff dich vff dz antlutz ~
