Die hellenpart gogen dem schwert
Item mann ir zusamen Gond so schickh dich also Inn dises stuck mit deiner hellenparten stannd mit deinem lincken fuosz vor vnnd hallt dein hellenparten mit deinner rechten hannd bey deinem hindern Ort gogen dem man dein lincke Inn der mitt gestrackts vor deinem gesicht Inn der hoch auf deinner lincken seiten indes haw Im behend nach seinem haupt hawt er dir also oben zu vnnd du auch mit deinem lincken fuosz gögen Im steest vnnd helst dein schwert auf deiner rechten Achsel den knopff Inn der lincken hannd gögen dem man so haw Im mit lannger schneid nach seinner hellenparten so nimbstu Im seinen haw damit hinweck indes trit Inn Trianngel vnnd haw Im mit langen schneid nach seinem haupt seiner lincken seiten Hawt er dir also oben zu so trit zwifach hinnein mit ginem nachraisen vnnd stich Im vnnden vnnd oben zwifach zu drit damit von Im zuruckh.
