Ainn anpünd In der Bauren stangen
Item wann Ir zusamen gond So schickh dich also Inn dises stuckh stannd mit deinem rechten fuosz vor vnnd haldt dein stanngen mit deinner linckhen hand bey deinnem hindern Ort. dein rechte Inn der mitt. mit gestracktem Arm. stat er dann auch mit seinnem rechten fuosz gögen dir vnnd hellt sein stanngen Inn baiden henden als du vnnd schlecht dir entgögen. so far mit deinner stanngen seinem schlag auch entgögen pind Im damit an. hastu Im also angepunden vnnd empfindt das Er dir starckh wider hellt. so trit mit deinem lincken schennckel auf sein rechte seiten vnnd schlag Im nach seinem rechten Arm. Schlecht er dir alsozu so henng mit deinner stanngen wol vnndersich auf dein rechte seiten so nimbstu Im seinen schlag damit ab. Indes volg mit deinem lincken schennckel hinnach vnnd schlag Im nach seinem haupt seiner rechten seiten. trit damit von Im zuRuckh
