Die anndern Kampfstückh des lanngen schwerts.
Item wann du mit disem Kampfstuckh fur den Man kumpst. so schickh dich also darein. stee mit deinnem linncken fuosz vor vnnd halt deinn schwert ann deinner rechten seiten. greiff mit deinner Linncken hand In dein klinngen. deinnen Ort furgewenndt. volg mit deinnem Rechten fuosz hinach. vnnd greiff mit deinner rechten hannd zu deinner linncken Inn dein klinngen. Indes schlag In mit deinnem knopff zu seinnem haupt. Schlecht er dir also nach deinnem haupt. vnnd du mit deinnem rechten fuosz vorstast Inn der halben Kron. so volg mit deinnem Lincken fuosz hinnach vnd far wol auf In die gantzen kron. vber dein haupt. so versetzt du Im das. Indes stich Im mit deinnem Ort zu seinem gesicht. versetzt er dir den ort. so trit mit deinnem rechten fuosz fur seinnen rechten. vnd gee Im mit deinnem knopff In sein Lincken Elenpogen. trit mit deinnem rechten fuosz wider zuruckh. vnd scheub mit deiner Lincken hand vbersich mit der rechten zeuch zu dir. so prichstu Im den Arm.
