Ringenn merck Ann welcher seitten Er dür hatt Anngesezt, so greiff sein kling mit teiner Lüncken hendt thring Also von dür Inndes zuck ab, vnnd Ruck Inn zu dür vnnd Erwische in mit der rechten hanndt, sein rechte handt, vnd Ruck In zu dür vnd begreif sein leib vnnd heb übersich, vnnd Er heb In vnd schlag Im die fies vndenn Aus vnd würff In von dür,
Ittem sticht Einer auff dich, so stich mit Im gleich hinein auff sein linck seitten, vnnd ÿm stich fang sein kling zu deiner vnnd fahr mit deim knopff vnnden durch beidt Arm, vnnd schlag übersich so mus Er laßenn
Ittem hab Acht welche henndt du Im Erwischen megest die Ruck zu dür, vnnd mit der Anndern hanndt greiff Im seinen Elenpogenn, vnnd Him[1] Im das gewicht, vnnd Inn Allen thrits bis nit zu goch, Auff das du Ein sattenn stanndt habest,
Ittem so du einen geworffenn hast, fellt Er so fall mit zu seiner Rechtenn vnnd müt dem Rechtten Knie zwischenn sein beidt bein, vnd mit der lincken handt vm sein hals, so du Inn gewis gefast hast, so Ruck dein dolchen, greift Er zu dem dolchen, so stich Im zur handt vnd Ruck mit wüder, bis du dein forteil beßer Ersehen hast
Ittem Ein Anders nim sein rechten Arm zwischen dem bein, vnnd leg dich Auff Inn zwerchs vnd haltt dein bein fast zu
- ↑ Unclear.
