Ittem binndestu einem ann Ein blatt ann das annder, so far mit deim blatt Ein wennig über seinns, vnnd winndt mit deim blatt über sein stangenn Reis vndersich, so Ruckst Ime sein wechr in die schwech, fachr Im in das gesicht wertt er das vnnd fertt mit den armen übersich, so wechsell durch neben seiner Rechtenn vnnd stich Inn, In die brust ⁋
Ittem binnd Im ann, vonn deiner Rechten Ist Er ein wenig hartt, so wechsell durch zur anndern seittenn vnndt stich Im zum gesicht, versetzt er den stos so wendt das blatt übersein stanngen Reis zw dür ⁋
So du Einem anbindest vonn deiner Lincken, so wechsell durch vnnd stos auff der anndern seitten denn halbenn theill zur blös, als baldt Er denn stos ab wendt vnnd bechenndt noch stoßen will, so merck In dem er stosst, so thritt aus seim stos auff dein Recht seitten vnndt schieb die helpartten vonn dür über sein stangen aus vnd fang Inn mit dem blatt vmb denn hals vnnd ziege zu dür, oder fang Im sein forder hanndt, Reis Im die ab, Rück Im sein helpartt aus vnnd stos nach ⁋
Ittem so dür Einer oben zu stost wend Im den stos ab vonn deiner Lincken Ergreiff Inn bej seim fürgesezten bein vnnd Reüß Inn zw dür ⁋
