Merck wann dich einer also fast, so zuck übersich ab vnd senck Inndes bechenndt die spütz zur Erdenn, das deinn hindre[!] handt hoch über deim haupt steche wendt Im also denn stich ab durch das verchenngen, zwüschenn dür vnnd Im aus setz Im Inn das gesicht oder greiff Im mit dem blatt auch, an sein fürgesezt bein ziege zu dür ⁋
Ittem füertt Er dür dein helbartten zu hoch so bleib fest, vnnd ann seim blatt ⁋ vnnd vnnder lauffe Inn mit dem hindern ortt, arbeitt mit denn winden über sein stanngen oder vnnder sein arm vnnd such mit dem hindern ortt die blös ⁋
Merck wann du also Einen vonn vnnden auff gefast hast mit deim blatt vnnd Er dür vonn obenn hartt thruck, so thritt auff ein seittenn vnnd las die helport durch lauffenn, mit über winnden Inn sein gesicht ⁋
Ittem stanndt mit dem lincken vor die helpartten vor dür mit der spitz auff der Erden, stos einer auff dich, so wennd Im dem stos ab vonn deiner Lincken vnnd Im abwenden thritt mit deim Rechtenn hinder dein Lincken vnnd stich Im gleich mit Inn sein gesicht ⁋
