Item greifft dich einer bey den armen vnd du ihn auch, so laß deine Rechte handt ab, vnd fhar vnden durch vnd schlag von vnden ahn sein gelenck des Rechten arms, vnd brich also von vnden vbersich durch vnd ergreiff ihn bey dem Rechten Elenbogen, vnd mit der Lincken handt, greiff vnder dem Elenbogen ahn sein Arm vnd thrit mit dem Rechten zwüschen sein bein oder darhinder, vnd stos von dir. ⁋
Merck wan dir einer vmb den Leib vnder den armen fert es sey mit Lincken oder Rechter, so schlag mit dem selben arm, außwendig ahn sein gelenck vnd wendt dich von ihm. ⁋
Item hab acht als baldt er sein fieß strack heldt, so thrit ihm darwider Merck ihn allen Ringen, das er dich nit ahn die gemecht stos, Also hab acht als baldt er sein fuß auff hebt zum gemecht stos, so schlag mit deim fuß, gegen seim auß, thrit ihm als dhan nach mit eim thrit oder stos zum gemecht,
Item so dich einer beschlossen hett, oder nach dir greifft mit offnen henden, so schaw das du ihm ein finger ereilest den brich vbersich, so muß er lossen oder gewinst sunst dein vortheil. ⁋
