Sthestu In der vndernhutt zur Rechten, so hab acht als baldt er auff zuckt zum stos, so thrit mit deim Rechten zwischenn dir vnd ihm durch auff sein recht, vnd stich ihm außwendig vber sein rechten Arm zudem kopf, so baldt er vbersich zuckt, zur versazung, so ruck den stoß wider an dich, vnd stich von vnden zu seiner Rechten vchsen, den dritten stich mit einem Riß von deiner Lincken durch vber sein arm ⁋
Item haldt dich In der vndernhutt zur lincken, so fahr auff mitt deim dolchen vnd trawe ihm den knopf außwendig vber sein Rechten Arm zum kopf, zuck behendt wider, vnd stich ihm vbersich vnder seinem arm zur kell, Indes stich wider von deiner lincken vber sein Rechten arm wegk ⁋
Item sticht einer von vnden auff dich, so greiff mit deiner lincken ahn den dolchen kling, versetz ihm also den stich von oben zwischen dein beidt hendt, vnd ergreiff sein dolchen kling zu der deinen In dein linck handt, vnd fahr ihm mit dem dolchen knopf außen vber seiner handt vnden durch, brich vberstich mit deiner Rechten handt, so muß er den dolchen lassen. ⁋
