In Lincken wechsel, sticht Er so setz mit der langen schneidt ab, vnd wend im den stich vber die handt zu seim gesicht, vnd wind bechendt wider vmb ann seiner klingen vnd stich Im zur hifft verkhertt, Ruck auff dein Lincken seitten vnd haw ein wehr streich durch sein Rechten so kumestu wüder In den Rechten wechsell von dannen nim ferner aus mit verhengen vnd stich über dein hanndt zum gesicht, vnnd schneid Inn die Eisenportt ⁋
Ittem nim aus wie oben, vnd stich über die handt zu seim gesicht,
Ittem nim aus vnd draw Ime den stich über dj handt, zuck vnd hew im auswendig durch sein Rechten bein, vnd haw den 3 behendt Ein wechr streich durch sein Lincken von deiner Rechten ⁋
Wechsell zur Lincken ⁋
Merck stehestu im Lincken wechsell so nim aus mit der flech, dz dein wechr über deim haupt vmb schiese draw Im den hertz stich, zuck vnd haw von deiner Rechten durch sein fürgsetz bein, vnd stich im durch den Lincken ochsen über die handt zum gesicht,
Ittem nim aus vnd haw vm dein haupt auswendüg zu seim Rechten pein so kumestu auff die Rechten seitten von danen nim aus durch das verhengen vnd stich Im Inwendig zu seim gesicht vergis der thrit nit,
Ittem nim aus mit halber schneidt starck übersich, vnd haw von oben Inwendig zu seiner handt durch, vnd stich im über dem handt zum gesicht ⁋
Eisennportt ⁋
Aus der Eisenport ficht die wechsellhew wie sie rennen gelertt, darunder mishc die stich noch glegenheit oder greiff an mit eim wehr streich, so kumestu als baldt in der vorgeschrieben stuck eines
Ittem lest Er dich anbinden ann Erstersten seiner klingen von deiner Rechten so Reus aus auf deim Lincken seüten dz du in Lincken ochsen kumbst, stich im als den vnder seim arm inwendig zur brust wend mit dem gefes auf dein Lincken seütten vnd hew ein werstreich durch sein Rechten allerding wie in dem stuck mit deiner verzeichnet
