Rapür klingen vnnd bleib darauff so vill du kanst vnd stich im bechendt zur nechsten blös ⁋
Ittem im thretten so kum mit deim rechtenn vor, vnnd haw also vnder deinen lincken arm vonn vnden auff durch sein handt, das dein wehr übersich in die luft fleigt haw im bechendt von deiner rechten durch sein fus so kumestu wüder in die kreutz hut wie du vor gewest bist, tringt er vff dich so haw ein wehr streich von dir, vnd far mit dem dolchen für, Als bald du im sein wehr ergreiffest mit dem dolchen, so stich im zur nehstenn blös, vnnd merck so du im obenn zu einer blös stichest vnd er dür mit seinem dolchen dahin versezen will so zuck behend ab durch die rosenn vnd stich im zur vndern blös desgleichen thu so dür ein vnder stich versezt so zuck vnd stich Obenn ⁋
Ittem so er seinen dolchen aus streckt zur versazung, so haw im starck von oben zu der selbigen hanndt, als baldt Er sein hendt übersich ruckt zur versazung, so zuck ab vnd stich im vnden hinein zwischen seinen beiden wehren, versezt er dz auh so las über die hanndt ablauffen vnd haw im oben durch das gesicht ⁋
Merck Ein Regell wan du Im vnder denn dolchenn zum fus hawest vonn deiner rechtenn so ziege denn anndern behenndt herwider von deiner lincken durch sein fus desgleichenn wann du vonn deiner Lincken vnder deim arm zu seim fus hawest so hawe behendt hinwider vonn deiner rechten, Also wann du vonn deiner rehtenn Oberhalb deines Lincken arms, oder dolchen durch sein gesicht hewest so hawe behenndt herwüder vonn deiner Linckenn oberhalb denn arm auch durch sein gesicht,
Ittem so du aber oberhalb deim lincken
