Ein gesicht stich mitt einem sprung zum man ⁋
Item sthe mit dem Rechten vor, haldt deim Rapier im Ochsen zur Rechten Indes erheb dein Lincken fuß, vnd In dem der fuß In der lufft schwebt, so stich von oben nider neben deim Lincken schenckel durch, Indes thrit, spring mit gleichen fussen zu ihm hinein, vnd Im sprung stich neben deiner Lincken vber die handt zu seim gesicht, das sol man einem vhnuersehens thun Item ihm sprung magstu den gesicht stich In ein wehr streich Mutiern
Ein stich zum gemecht sprungs weiß
Item Im zufechten, so du noch drey schrit von ihm bist, so khum mit dem Rechten vor, nim die wehr In Lincken Pflug. Indes erhebe dein lincken fuß auff vnd erholle damit ein vnlauff, vhff zwen schu weit für dem Rechten fuß zum schwung, vnd In dem schwung Mutier den pflug In ochsen, vnd ihm Mutiren schwing dich mit gleichen fussen zu ihm, vnd In dem sprung so verwendt In der lufft vnd mutier den Ochsen in Pflug auff zur Rechten, vnd stich Im sprung von vnden zum gemecht, also hab ich offt einem einer kloffter weit erreicht vnd vhn versehens vbereilltt. ⁋
