Mercke: Haltt die wehr In der neben hut, sticht oder hawt dir eyner zw: so nimme mit deiner flecht von deiner lincken gegen der Rechten mit stercke aus, das dein wehr über dem haupt vnden vmblauffe, haw In deß eyn Mittelhaw durch sein füeß von deiner Rechten durch, stich behendt vber die handt nach dem gesicht.
Item sticht dir eyner zu der brust, so hawe von vnden mit langer schneiden auß der nebenhuett sein herkommen stich über sich auß, In des tritt mit dem Rechten fuß vff sein Lincken seyttenn, verwende dein wehr, oben In der lufft vnnd stich Ihm eym schlander, nebenn deiner Rechtenn vonn vnndenn zw seinem gemächt, der stich soll behendt Inn eym wurff vonn obenn ümb vnndenn hinein fliehenn.
Eyn gut treiben mit zwen heẅen
Im zugang kumme Inn die Nebenhut, Alß baldt du denn Mann drawest zuerlangenn: so haw denn erstenn vonn deiner linckenn mit langer schneydt eynn weher streych durch seinn weher vonn obenn, denn andernn eynn vnder haw durch sein lincke, den dritten haw wider wie den erstenn, den vierttenn wie denn anndernn, Also hawe die zwen hew Immer Inn eynander, so lang biß du dein gelegenheyt sichst, so stich oder haw Im zur nechsten blöse vnndenn oder obenn.
