von deiner Rechten durch des mans Lincken strich ⁋
Also threib den haw ein mol oder 6 auff einander alwegen durch ein strich zwey mol, nemlich ein mol oben vnd wider von vnden mit der halben schneidt, mit dissem wechsel bricht man alle Leger vnd hutten. ⁋
Hawet einer ein oberhaw auff dich, so haw ihm den mit einem Mittelhaw oder Zornhaw hinweg Indes behendt mit einem andern haw zur bloß, vnden oder oben. ⁋
Hawet einer ein Mittelhaw oder vnderhau, so haw mit einem oberhaw drauff starck durch, den Andern wider zur bloß, vnd so offt du dich nach seiner blöß verhawen hast, so schaw das du alwegen mit versatzung behendt ahn sein wehr oder arm bist
Hawt einer vnden, so hew oben, hawt einer oben, so haw mit außtretten schlims mit ihm hinein, Fehret er zu hoch auf, so haw ein Mittel durch, folt einer zu tief, volg ihm zum gesicht von oben, wischt er vbersich zu versetzen so zuck den haw vmb den kopf vnd haw von vnden, wuschet er dem vnderhaw noch so vorzuck vnd haw oben.
Item feret er zu weit auff sein Recht, so haw durch sein gesicht, fehrt er zu weit vff sein Lincken so haw außwendig, vber sein arm zum kopf ⁋ Derohalben so in einen wilt zur Lincken bloß haben so verfier zur Rechten also wildt die Recht bloß haben so verfier zur Lincken Also auch wiltu ihn oben haben, so greif vnden an mit hewen vnd stichen,
Item hab acht
