Ittem im zuganng fas denn dusacken krumpt, vnnd stich im obenn ein zum gesicht zuck denn stich wüder ann dich vnnd haw krumpt durch die mittel linie vonn deiner rechtenn durch sein Lincken, vnnd las verfliegen in ein dopel rinde vnnd haw im den andern ein brummer vonn deiner Rechten, den dritten lanng vonn obenn durch kreütz wegk ⁋
Wecker ist also ⁋
Wann du zu einer blöß einhawest, vnnd im threffenn verwennd denn haw zu einem stich, wie die fiegür Im winndgaw anzeügt
Ittem wann du ein ober haw auff einenn hinein hawest, als baldt es glitz so stich im auff seiner wehr hinein, als baldt er den stich auch wehrt, so far mit dem hefft vnnder seiner versazung hinein zum kopff ⁋
Ittem im zuu fechtenn last dich einer annbinnden von vnden, so stich behend an sein bandt hinein, als baldt begreiff sein dusacken nider mit vnd windt im den aus seiner hanndt auff dein linck seüttenn ⁋ merck im greifen sol dj ofen lj gegen dir standen ⁋
Brumer, diser haw hatt den namen von der geschwinde dz zum theil dj flech mit leufft vnnd ein windt hüebt ⁋
