Ob es empfal
dem ende im ab schal
Hie merck, wie du dye 4 stuck aus den 4 huten threyben solt
Item aus der ersten hut wen du die gleffen auff das lengst gefast und mit im zu samen reitest, so thue gleych, als du in in das gesycht wellest stechen; in des las deyn gleffen vornen syncken und Wechsel damit unden durch seyne gleffen auff deyner rechten seiten; do get seyne gleffen auff deyner rechten seyten hyn weg und dye deyne tryffeth
figura
Item darumb sprychet dye erste vigur jag von der prust zu seyner rechten hanth
Item wen du mit deyner gleffen durch wechsest, so las den zaum varen und kum mit der lincken hant der gleffen zu hylfif und sez im an
figura
Item darumb sprycht dye sechste figura greyff an mith baden henden dye sterck
Item dye ander huth
wen du den ort lest hangen zu deyner lincken seyten und du mit im zu samen reitest, so streych stet auff gleych mith der gleffen zu seynner rechten seyten; und las den zaum varen und kum mith deyner lincken hant der gleffen zu hylff als vor
Item aus der dryten hut
wen du dye gleffen hast in der miten mitt beyden henden und du mith im zu samen reytest, so sez in seyn gleffen ab mith deynem vordem theyl deyner gleffenn und reyt vor dych und sez im an
