do halt dein Schwert In der hutt vber dem haubt vnd thü als dw Im In das gesicht wollest ansetzen vnnd las dein Schwert vorn auß der Rechten hand vnnd kom domit der linken zw hilff mitten In die klingenn vnnd Schlag Ime mit dem knopff zw dem vorgesatzten fus oder zw seyner vorgesatzten hanndt do er das Schwert In der mitt mit helt also magstu auß der vndern hutt von der selben Rechten seyten auff Schlagen
Item Aüch soltu dich gar ebenn fursehenn wen er dir mit dem knopff schlecht zw deynem vorgesatzten knye oder zw deyner vor gesatzten hand das dw In dem Schlag also versetzt mit den vor geschribenn Bruchenn das er dir nicht schaden mag…
…mit der gleich ein (?) oder versetzt So far auff mit dem Sper In die obern hutt so Bleibt dir sein ort auff deynem linken arm in seim gesicht fert er auff vnd versetzt mit dem linken arm so zuckt vnd setzt Im den ortt vnter sein links vchssen In die Blose
Das Ist der text wie man zuckenn Soll
Wiltu zuckenn vonn Stechenn
mit zuckenn lere wer Brechenn
Glosa merke also das Ist das wol lernenn solt das dw also zwckes das man dir Icht an setz dieweill dw durch zwckes das vernim also wen du Im auß der vntern hutt zw Stichs versetzt er mit dem Sper das sein ortt nebenn dir beseitt auß gett so zuck durch vnd Stich Ime zw der andern seyten Oder pleibtt er dir mit der andern versatzung mit dem ortt vor dem gesicht so zuck nicht vnd Bleib mit dem Sper an dem Seynenn vnd arbeitt mitt dem windenn zw der nechsten plose die dir werdenn mag
