Wiktenauer logo.png

Page:Ergrundung Ritterlicher Kunst der Fechterey (Andre Paurñfeyndt) 1516.pdf/45

From Wiktenauer
Jump to navigation Jump to search
This page contains changes which are not marked for translation.

This page has been proofread, but needs to be validated.

KAMPF stuck

Stich ym inwendig czu dem gsicht und vardurch, und stich ym auswendig czu dem gsicht wert er dir dasz aber, so schreit mit deinem lincken fusz czwischen sein peyde pain, und greiff mit deim knopf aussen uber sein lincks pain in die kniepug, und heb ubersich mit deim knopf und mit der lincken achsel truck oben von dir, so velt er

PRUCH

Wan dir ainer fert mit seinem knopf in dein linck kniepug, so greiff mit deiner lincken hand ym hinder sein lincke handt, und greiff mit deiner rechten handt von unden auff an sein elpogen, und nim ym dasz gwicht

KAMPF Stuck

Stich ym inwendig czu seim gsicht, und secz ym an, werdt ers so zuck, und stich ym czu der andernn seitten, werdt er aber und streicht dir dein ort ab, so far mit deim knopf ym uber sein rechte achsel umb den halsz, und spring mit deinem rehten fusz hinder sein lincken, vud wirff yn dar uber

PRUCH

Wan dir ainer mit seim knopf uber dein rechte achsel umb den halsz gfaren ist, so pegreiff ym den rechten elpogen mit der lincken handt und stosz yn von dir so gwinstu ym die seitten an

Ain Ander PRUCH

Wan er dir mit seim knopf umb dein halsz gefaren ist, so begreiff ym sein rechten armen mit deiner rechten handt, und haldt sy vest, und wendt dich von ym auff dein rechte seitten und wirff yn uber dein lincke huff