Wenn dich ainer hintn bey der gürtl vast so sennck dich nyder vnd wenn er dich erhebt so drä dich vmb vnnder Im vnnd wurff in vber schranck ge mitt der rechtenn hannd durch vnd fach in oberhalb der hüff in der waich vnnd far im mit der tenncken hannd vber sein rechte achsel vnnd fach dan dein rechte hannd Im glennck vnd halt die vest vnd heb in auf vnd mit deinem rechten chnye erheb im sein tenncks chnye vnnd wurff in fur dich
begreyff im sein rechte hand mit paidn henndn vnd zuck in für dein rechte seytenn vnd schreyt mit deinem rechtenn füeß hinder seinenn rechtn vnnd far im mit dem rechtn arm in sein tenncke seytenn vnd würff in vber dein rechte huff
wenn dir ainer wil farnn mit paiden armen vber dein paid arm so far von obenn nyder mit deinen paiden armen ausenn vnder seinen elpogenn vnnd schlach dein arm zw samen vnder seinem elpogenn vnd heb mit sterck vbersich vnnd prich im die arm Auch magstu im vallenn In die chel vnnd in zw ruck druckenn
Wenn dw vndenn pist mit deinen armenn so magstu in obenn vassenn bey der chel oder bey dem chinpacken vnnd im den hals wol vber denn ruck druckenn oder brechenn oder dw magst wol mit deinen armen durch die sein farnn Wenn dw mit deinem tenncken arm vndenn pist so val im mit dem rechtn in die chel vnnd schreyt mit deinem rechtenn fueß hinder seinen rechtn vnnd druck in vber bey dem hals
Wenn dw mit ainem mit baidenn armen durch sein arm gefarnn pist vnnd ist er also ring als dw pist oder ringer so vaß in in der mitt vnd sleus dein hennd vast zw samen auf deinem ruck vnd heb in auf dein tenncke seytenn vnd wenn dw dich ains vmb getrat hast so stos in nyder auf die chnye vnnd prich im den ruck zw dir
Wenn dir ainer mit dem haubt durch die arm farenn wil vnd wil dich vber sein ruck werffenn vach in mit dem selbigenn arm bey dem hals vnnd druck In vast zw dir vnnd leg dich mit der prüst obenn auf in vnnd swär dich nyder
Wenn dich ainer begriff hindenn wenn dw im hast denn ruck zw gewännt vnd hett dich geuast in sein arm vnd obenn vber sein arm so puck dich behenndichleichenn fur dich vnnd würff in vber das haubt oder fach in vndenn mit einer hannd bey dem pain
wenn dich ainer hat geuast vnnd hat seinen arm vnder deinem arm vnnd hat er die hennd offen so begreyff in bey einem finger so mues er dich lassenn Wenn dich ainer vornn bey dem gollier vast vnnd helt dich vest mit einer hannd so wennd dich vnndenn durch seinenn arm mit dem hawbt so lät er dich oder magstu im denn daumen begreyffenn das ist auch guet Vast dich ainer hintn bey dem gollier wenndt dich gegn inn mit dem hawbt vnden durch sein arm so lätt er dich
Wenn dich ainer vast mit paidenn henndn vor der prust so stos im denn rechtenn elpogn auf vnnd trä dich durch vnd fach in in der wüest Wenn dich ainer hat geuast bey denn armenn vnd er dich wider vnd er hat dir begriffenn dein tenncke hannd mit seiner dencken vnd wil dir mit seiner rechtn hannd das gewicht nemen bey dem tenncken elpogenn stößt er dir denn elpogenn hoch auf so wend dein haubt durch dein tenncken arm vnd far im mit deiner rechtenn hand vnder seinen tennckenn arm In die wüest vnd spring mit dem rechtn fueß hinder seinen tenncken vnd wurff in vber dein rechte hüff
Wenn dw dein haubt durch deinen tencken arm gewennt hast so begreyff im ein pain mit der rechtenn hannd vnd ruck in nach dir Wenn dw ainen hast geuast mit deiner tennckenn hand in der maus seins rechtn arms vnd druck in do mit zw ruck vnd er dir dann vberfelt mit dem rechtenn arm von aussen ṽber dein tenncke hand vnd druckt dir dein hand vast an sein prust so far im mit dem selbn elpogenn in sein rechte seytenn vnd senck dich nyd vnd spring mit deinem tencken fueß hinder seinen rechten vnnd greyff im mit der rechtenn hand In sein chnyepug vnnd wurff in vonn dier etc
