Item wann er dir den stich versetzt, Unnd weist dir den Ort beiiseiits auß auf sein linncken seitten so far mit dem rechten Arm hoch auf Inn das ober gehenngck stich Im zu dem gesicht
Item wehrt er den stich unnd fert hoch auf so reit an In unnd far mit deinner lincken hannd Inn wendig auf uber seinnen rechten arm unnd begreiff den zaum unnder seinen rechten Arm, und mit linker verkerter hannd, so hastu In gefanngen beii dem arm, so stich dein messer oder degen damit such die ploß oder ruckh mit deinner Rechten hand sein zaum dem Roß uber die Oren so magstu In zaum loß.
Bedennckh die ploß
Such messer nit wart der kloß
Das ist wann du In mit dem zaum allso gefanngen hast, alls vorgeschriben steet unnd ist Er gewappnet, so solltu wissen, wo du In ploß findest, alls du In gewinnen mugest.
