Ein einganng mit ainem Würff
Item schickh dich Allso Inn dises zufechten. stannd mit deinem lincken fuosz vor. vnnd halt deinen dolchen den daumen bey deiner scheiben. stat er dann auch allso gögen dir mit seinem rechten fuosz vor. vnnd stost dir nach deinem gesicht. so greiff mit deiner lincken hannd wol vornen In sein rechte. so ist Im sein stich versetzt. Indem far Im mit deiner rechten hannd. mit dem dolchen vmb seinen rechten schenckel wol In sein kniepug. vnnd zeuch damit vnnden wol an dich vnnd oben scheub von dir. so wirfstu In zuruckh.
