Felerhaw ⁋
Merck wann du noch zu im kumbst, vnnd Ir beide hoch in der versazung stanndt, so haw vor seiner Recle fell, ein Zürkell, so baldt er die büege an sich zeiht, vnnd schlagenn will, so haw im neben dem gehils zum kopff wie oben im bochhaw gemolt stett ⁋
Ittem wan dür einer zuhawett so weich mit deiner versazung vnd laß inn fel hawenn, thrit vnnd haw als baldt auswendig seines Rechtenn arms fell durch, den andern sein gesicht, bis behendt wider in versazung ⁋
Ein stuck auff ein lincken
hawe im auswendig seines lincken arms fell durch das dein dusackenn auf dein Linck seitten kumpt, Inndes so baldt er hawett so hawe mit im zw gleich vornen hinein zum gesicht, thrit mit dem lincken woll auf sein rehten ⁋
Item hewe im fell auswendig vnnder seim arm durch wie vor, den anndern nim wegk mit der flech vonn deiner Lüncken durch sein Recht, das dein dusacken obenn vmfleigt, thrit vnnd Hewe Inndes zwenn winndthew in einander von deiner Lincken zu seiner rechten in das gesicht ⁋
