Wie du an seinem Spieß herab schlagen / durchwechseln / und auff der andern seiten hinein stossen solt.
ODer binden jhm mit gleicher Hůt von deiner Lincken seiten an sein Stangen an / vnd schlage an seiner Stangen durch nider / gegen seinen fingern / im schlag aber so wechsele vnder seinem Spieß durch / vnd stosse behend mit einem außtritt / auff der andern seiten hinein. Gegen die aber / die nicht bald nachstossen / gebrauch das stuck also / Nach dem du jhm wie oben gemelt / angebunden hast / so schlage jhm abermal wie vor / an seiner Stangen zů seinen fingern nider / vnd fahre jhm hiemit vnden durch / trauwe jhm auff der andern seiten mit ernstlichen geberden zů stossen / in dem er aber deinem stoß entgegen fahren / vnd denselbigen versetzen will / so wechsel eilents wider durch / auff das er mit seinem versetzen vergebens verfahr / vnd stoß jhm mit einem außtritt eben auf der seiten (an welcher du den schlag volbracht hast) hinein.
Ein anders.
JTem Wechsele abermals mit obgemeltem schlag durch / vň schlag von der andern seiten krefftiglich vberzwerch wider seinen Spieß / vnd (dieweil er noch also daumelt) so stosse im zůr Blóß / Oder wo er hart wider helt / so wechsel durch / vnd stoß auff der andern seiten. Fúhrestu aber deinen Spieß in der Oberhůt zům streich / vnd er stoßt gegen dir her / zů welcher seiten er dann herstost / so trit du auff die ander / vnd schlage an seinem Spieß von oben nider / als bald in solchem schlag der vorder ort seinem gesicht gleich kommen ist / so schiebe den Spieß fúr dir hin / vnd mach also aus dem schlag ein stoß.
Durchwinden.
MErck wann einer in gerader versatzung / oder sonst in einer Hůt darinnen er sein Spieß gerad vor jhm herfúhret / dir begegnet / so binde im von deiner Lincken gegen seiner Rechten an / reitze in also mit geberden / trucken vnd trauwen auff allerhand weiß / so lang biß er stoßt / vnd in dem er demnach herstoßt / so gehe mit dem hindern theil deines Spieses / vnder dem seinen gegen deiner Rechten durch / vnd wende mit demselbigen gegen deiner Rechten vbersich / also das du im seinen Spieß mit solchem vbersichwenden / gegen deiner Lincken abtragest / davon besihe das ober Bild in der Figur D. zůr Lincken hand / setze im demnach dein Spieß inwendig ans sein brust.
