leychtlich außschlagen noch außrucken móge / vnd nim wahr stoßt er gegen dir her / es seye gleich gegen Rechter oder Lincker seiten / so trit von seinem stoß zůr seiten auß / vnd stoß mit jhm hinein / oder Dempffe jhm sein Stangen (in dem sie zům stoß herfleugt) von Oben nider / vnd stoß behendiglichen ehe dann er sich wider erholt / gegen seinem desicht / fúhlestu aber das er so behendiglich mit seinem Spieß vbersich fehrt / also das du jhm mit dem stoß nicht ereylen kanst / so wechsele (in dem er vbersich fehrt) vnder seinem Spieß durch / vnnd stoß auff der andern seiten hinein.
Wo er aber zů erst nicht stossen wolt / sonder stelt sich gleichfals in starcke versatzung / so binde jhm hart in die mitte seiner Stangen / vnd trucke jhm dieselbige hart vndersich von dir / helt er hart wider / vnd truck vbersich / so fahr eylents vnd behend vnden durch / vnd falle jhm von der andern seiten wider seinen Spieß / truck abermal mit gewalt vndersich von dir / vnd das treibe von beyden seyten / so lang biß du ihn ermúdest vnnd krafftloß machest / also das er den nicht lenger in seinem gewalt erhalten mag / stosse jhm als dann (dieweil er also mit seinem Spieß noch baumelt) der nechsten Blósse zů.
Herwiderumb wann dir einer also hart ahn deinem Spieß ligt / vnd will dir die also zůr seiten vndersich austrucken / so nim dich an als woltestu hart widerhalten / vnd dargegen trucken / aber in dem wann er sich dessen am wenigsten versihet / so wechsele eilents vnder dem seinen durch / vnd fall jhm von der andern seiten wider an seinen Spieß / vnd trucke im den eben gegen der seiten / gegen welche er dir deinen außtrucken hat wóllen / so zwingestu jhm den vndersich / also das er sich schwerlich ohngeletzt oder ohn schaden wider erholen mag.
Will dir dein gegenfechter / von wegen deines außtruckens vnder deinem Spieß durchgehen / so falle jhm alwegen (dieweil er noch also im durchwechseln ist / von der andern seiten mit dem band hart an sein Spieß / vnd das gegen beiden seiten / jhe lenger jhe weiter vber die mitte seiner Stangen / damit er an keinem ort zů frúchten noch durchkommen kónne oder móge / so lang buß du dein gelegenheit zůstossen ersihest.
Nebenhůt.
JM zůfechten fúhre deinen Spieß mit dem vordern ort ein wenig zůr seiten auß auff der erden / aller dings wie das ober Bild zůr Lincken hand / in der Figur C. anzeigt / als bald nun einer gegen dir hersticht / so trit be
