Page:Gründtliche Beschreibung der Kunst des Fechtens (Joachim Meÿer) 1570.pdf/327

Regel.

AUß disem Ochsen ficht jhm fúrnemlich gegen seinem Arm / also wann er von vnden oder gerad zů / gegen dir her sticht / so entziehe jhm deinen leib mit zůsamen weichung deiner fúß zů ruck / vnd Hauwe oder Stich jm dieweil er seinen Arm ausstreckt gegen demselbigen Arm / gefeß / oder hand / darinnen er sein Wehr fúhret.

Item wann du also in gemelter Oberhůt vor deinem widerpart stehest / vnd er Sticht dir von vnden oder gerad her / dir zů / so trit mit deinem lincken fus wol aus gegen seiner Rechten / vnnd verwende dieweil dein klingen mit der spitz hinder dir aus zům streich / Hauwe jhm demnach seine herfliegende klingen von deiner Lincken gegen deiner Rechten mit hangender klingen aus / wie solches das vnder grosser Bild zůr lincken hand in der Figur C. anzeigt / trit gleich in disem ausschlagen mit deinem Rechten ferner gegen seiner Rechten / von solcher versatzung zůcke dein Wehr gegen deiner Lincken wider ab / vmb den Kopff / vnd Hauwe jm oberhalb seiner Wehr (ehe dañ er die wider auff oder die in sein kreffte bringt) von deiner Rechten schlims durch sein gesicht / oder gegen seinem arm vnd hand darinnen er die Wehr fúhret zů / so kompstu in die Lincke vnderhut.

Wann er nicht Hauwen nach stechen wil / wie du vor jhm fehl stechen ausnemen vnd nachstechen solt.

ITem jm zůfechten kom vbersich in die Oberhůt / in dessen wann du also vor ihn stahst vnd er nicht arbeiten wil / so trit mit deinem Lincken fůß fúrter zů jhm / vnnd in dem du also fúrtritst so Stich von Oben ausserhalb deinem Lincken fůß zů ruck durch fehl fúruber / also das du (nach ende des stichs wider in die hůt des lincken Ochsen kommest / von dannen Reiß jhm sein herfliegenden klingen mit halber schneid vndersich gegen deiner Rechten aus / in solchem ausnemen aber trit ferner mit deinem rechten Fůß wol gegen seiner Rechten vmb zů jhm / Stich jhm von Oben mit starckem verwenden / vnnd einem weiten zůtrit deines rechten Fusses gegen seinem gesicht / also das du nach ende des Stichs zůr Lincken in die Vnderhůt kommest.