Ein anders / wie du jhm sein klingen von dir wegkschneiden vnd nach fechten solt.
WAnn du also vbersich in die Oberhůt zům stich ankommen bist / vnd dein widerpart sticht oder hauwet von seiner Rechten gegen dir / so trit abermals zwifach wie vor gegen seiner Lincken seiten auß seinem stich / vnnd wende behendiglich die Lange schneide aus der Oberhůt vndersich / vnnd in solchem vndersich wenden / so hauwe in einem flug mit nachgestrecktem Leib vollen gegen seiner klingen durch / biß in die lincke Vnderhůt / von dannen hauwe oder stich (ehe er sein klingen vnder der deinen herfúr Ruckt) gegen seinem gesicht / dises ist auch ein gut Regel aus allen Legern zůfechten / nemlich das du jm von einer seiten sein klingen schlims oder vberort vndersich von dir weg hauwest / vnd demnach eilents den andern von der andern seiten nach / es sey vnder oder oberhalb seiner klingen (jhe nach dem er behend wider auffkommen ist) zů seinem Leib.
Wie du jhme mit verhengen außnemen vnd nach fechten solt.
ALso wann du dein Wehr in der Oberhůt zům stich fúhrest / vnd es sticht dein gegenfechter auff dich her / so behalt dein gefeß vor dir / ein wenig zůr seiten ausgestreckt / vnnd laß dein klingen mit dem ort gerichts vor dir vndersich hangen / wende also mit hangender klingen (in dem er wie gesagt hersticht) dein gefeß gegen deiner Lincken / auff solche weiß fúhre jhm sein klingen zůr seiten aus / Wann du jhm nun also sein klingen sampt den austretten mit hangender klingen ausgeschlagen hast / so magst du als dann dem ausschlagen nach die klingen vmb den Kopff fahren lassen / vnnd mit einem weiten zůtrit deines rechten Fůß / von deiner Rechten gegen seiner Lincken vberzwerch starck durch hauwen / den andern hauw gerad von Oben mit einem gezogen Dempffhauw durch sein gesicht / so kompstu jm herab hauwen mit deinem gefeß ehe zůr erden dann mit der klingen / wie das grosser Bild in der Figur G. zůr rechten hand anzeigt / von dannen stich behend (ehe er sich widerum von solchem Dempffen erholet) gegen seinem gesicht.
