Page:Gründtliche Beschreibung der Kunst des Fechtens (Joachim Meÿer) 1570.pdf/323

so hauwe jhm sein herfahrene klingen von dir aus / vnnd eile behendiglich zůr Blóß / dann mit dem das du jhm also von beiden seiten etliche Háuw durch sein versatzung hauwest / machstu in zornig / auff das er dester ehe dein Blóß (die du jhm mit solchem durchhauwen geben must) zůficht / als bald er dann sein Wehr von jhm ausstreckt / so ist er mit derselbigen in der versatzung schon schwecher / darumb kanstu sein klingen leichtlich ausschlagen vnd nach fechten / oder fahr mit deiner Wehr vbersich in die Oberhůt / vnd biete jm den vordern leib also bloß dar.

Oberhut.

DIeweil du nun durch das ganze Fechten immer auß einem Leger in das ander komest / so will ich wie anfangs gemeldet / ein Leger nach dem andern fürnemen / vnd dich durch Exempel lehren wie du aus denselbigen ohngefehrlich fechten solt.

Das erste Exempel wie du mit einem / auß der Oberhůt zůgleich hinein stechen solt.

WAnn du jm zůfechten mit der geraden versatzung für deinen Mann kommest / vnnd er aber sich mit keinen stucken wil ablocken noch aus seinem vortheil reitzen lassen / so fúhre dein Wehr vbersich in die rechte Oberghůt des Ochsens / vnd fúhre jhm also den ort mit vbersich fúrsich außgestrecktem Arm gegen seinem gesicht / als bald er demnach auff dich sticht / so weiche mit deinem lincken Fůß hinder deinem Rechten zů jhm aus / vnnd tritt behend mit dem rechten Fůß auch fúrter zů jhm / in solchen tritten aber wende die Lange schneide gegen seinem herkommenden stich / vnnd Stich also mit jm zůgleich von dir hinein / so versetzestu vnnd triffest mit einander / wie das grósser bild in der Figur F. gegen der Lincken hand anzeiget / Dises stuck kanstu aus allen andern Huten auch treiben / gleich wie aus diser Oberhůt / nemlich das du aus seinem stich ausweichst / vnd wendest die Lange schneide gegen seiner klingen / fúhrest jhm die zůr seiten aus / vnd stichst mit jhm hinein.