Page:Gründtliche Beschreibung der Kunst des Fechtens (Joachim Meÿer) 1570.pdf/121

Auch so du recht durchschiessen wilt /
Krumb / Kurtz / Durchwechsel an sein Schilt.

Diß ist ein recht artig Meister stúcklein / wenn du im zůfechten bist so schick dich in rechten Zorn / als bald er sein Schwerdt in die lufft bringt / so Hauw ein freyen Oberhauw zů jhm / volfúhre den aber nit / sonder verschrenck in der lufft deine hend / das die Rechte hand vber die Lincke kom / vnd Hauw also mit kurtzer schneid Krump gegen seinem Hauw listiglich durch / in dessen trit wol mit einem zwifachen trit auff sein Rechte aus / vnnd Hauw mit Langer schneid zů seinem Rechten ohr / oder kom mit dem durchwechseln an sein Schilt gegen seiner Rechten / alda arbeit mit Winden / Schneiden vnd was dir fúr arbeit werden mag.

Ein stuck aus dem durchschiessen.

HAb im zůfechten acht / so bald dein gegenfechter sein Schwerdt zům streich auffziehet / so Hauw dieweil behend vnd listig vor jhm Krump durch (wie oben gemelt) damit du zů seiner Rechten aussen an seinen Schilt komest / vnd als geschwindt es nur rúhrt so winde jhm die kurtze schneid einwerts zům Kopff / vnnd ruck in solchem winden dein knopff wol vbersich / das die kurtze schneid dest dieffer kom / fehrt er dann auff zů versetzen / so laß dein kling wider vmbschnappen das dein Rechte hand wider vber die Lincke kome / vnd schnell jhm also im vmbschnappen wider vnden zů seinem Rechten ohr hinein / in solchem aber trit mit dem Lincken fůß wol auß auff sein Rechte / Zwirch dann bald wider mit einem abtrit zů seinem Lincken ohr dieff / vnnd wind an seinem Schwerdt dein kurtze schneid wider vnden heraus / zů seinem Lincken ohr / demnach Hauwe dich von jm / vnd solches alles soll durch das winden behendiglich volbracht werden.

Merck so er dich mit Krumpwolt irren /
Am Schwerdt recht bleib / den krieg thu führen /
Mit Winden / Schnieden vnd was mehr /
Mit verfliegen laß dich nit zů ferr.