Page:Gründtliche Beschreibung der Kunst des Fechtens (Joachim Meÿer) 1570.pdf/108

die andern stuck all zů beiden seiten / dann er wende gegen deiner Rechten oder Lincken hinein / so blóst er sein ander seiten / derhalben kanstu jhm den Kopff mit gegen winden leichtlich treffen / dann wan er einwerts windet / so winde du auswerts / so triffestu vnd fehlet er / merck so du also einem einwindest / vnd wirst vnder des gewahr das er dir wie nechst gelehrt gegen winden will / so wende gleichwol furt / im winden aber reiss mit deiner halben schneide auff die seiten gegen welcher du eingewunden hast aus / laß dein klingen vmbschnappen / oder ficht ander stuck / Dieser winden seindt achterley welche hin vnnd wider in stucken gnugsam angeregt / was aber weiter von gemelten winden an einem andern ort weiter gehandelt werden.

Also bistu nun bißher in disen ersten vnd andern theils disses Schwerdt fechtens / eigentlichen vnderrichtet worden / beide von des Manns vnd denn auch von des Schwerdts theilung / folgents vom zůfechten / Mittelarbeiten vnd Abziehen / neben andern notwendigen stucken vnd lehren / sampt den Exempeln im andern theil so aus dem ersten gezogen / was ferner andere hie zů notwendige stuck belanget / wirstu im folgenden Bůch vom Schwerdt fechten gnugsam bescheidt finden / souil ich dißmal zůschreiben fúr hab.