Ainn gsicht stoss gögen ainnem absetzen.
Item schick dich also mit dem gesichtstoß in dem zůfechten, Stee mit dainem linggen fůß vor, dain stangen in dainer rechten hand aůff dainer rechten hüff, Den ort gegen sainem gesicht, Steet er dann gegen dir in dem absetzen, sainen rechten fůß fůrgesetzt, sain stangen in der mit, mit sainen beiden henden, gestreckt vor sainem angsicht, so trit mit dainem rechten fůß hinain, und wind Im dainen hindern ort zů sainem gesicht saner rechte Seiten, Setzt er dir daz ab, so wind Im mit dainem andern ort zů sainer brůst, Indes setz dainen rechten schenkel zůrůgk, und schlag Im mit dainer stangen nach sainer rechten saiten, Schlegt er dir also nach dainer rechten saiten, so trit mit dainem linggen schenkel hinain. Und setz Im daz ab zwischen dainen baiden henden aůf dain lingke seiten, In des stoß Im mit dainem vordern ort zů sainem gesicht, Versetzt er dir daz, so volg mit dainem rechte fůß hinnach, und stoß Im mit dainem hindern ort zů sainen gemechten, Stoßt er dir also unden zů, so trit mitt dainem linggen fůß hindersich, und setz Im daz ab mit dainem hindern ort, Indes trit mit dainem lingg fůß hinain und stoß Im mit ainem zweifachen stoß nach seinem gesicht, trit damit zůrůgk in gůte versatzůng.
