Daß Sÿnt dÿ stuck mit dem puckler dÿe her nach geschribenn stehenn
Daß erste stuck mit dem puckler
auß dem ober hau Wan du den ober hau treÿbest zu dem manne so setz mit dem knopff deÿn schwert Inwendig auff den puckler zu deynem daumen Und stÿch Im von unten aüff zu seÿnem gesycht und wynt gegen seÿnen schwert und laß uber schnapen daß get zu paden seÿtten
Daß ander stuck
Item auß dem unter hau wen er dÿr oben zu heÿet von seÿner rechten achsel so wynt Im deÿn lyncke seÿten gegen deynen schÿlt so stehestu In zweÿen schÿlten so wÿnt den auff deÿn rechte seÿten ploß und greÿff Im nach dem maul wert er dÿr daß und hebt den schÿlt auff so nÿm daß lÿncke peyn daß get zu paden seyten
Daß drÿte stuck
Item auß dem puckler auß dem wechsel hau streÿch von der lyncken Seÿten auß dem puckler vast uber sych In seÿn schwert und hau Inn denn von der lyncken seÿten zu dem haubt und wÿnt ploß und stoß Im Nach dem maull
