Page:Cod.10826 259r.png

Die Kampfstuckh zu fuß, Imm Schwert unnd Harnisch..~

ITem cimb[!] das Schwerrt mit der rechtenn hannd beÿ dem bunnd, unnd mit der linnggen greif mitten in dir klinngen, unnd gee fasst zum Mann so muß er schlagen oder stechen, so komme vor, biß resch, greif frölich an, unnd bleib nahennt.

ITem stich ime Innwendig zum gesicht, wört er dir das so farr durch, unnd setz ime an, außwenndig an sein gesicht, wert er dir fürbaß, unnd streicht dir den ort ab, so wennde mit deinem knopf ime über sein rechten Achsell, unnd sprinng mit deinem rechten bain, über sein linngges, unnd wirf ine überruck.

Item Wer dir das thut, unnd hat dir den knopf an den halls geworffen, so farr mit deiner linnggen hannd von unnden auf, zwischen seinen beden armen, und schwinnge dich dann von ime, auf dein rechte sietten, unnd wirf ine über die hüFf.

Item Wann er dir den knopf umb den hals will werffen so greiff mit der linnggen hannd von dir, unnd greif hindter sein rechte hannd an das gebünndt, unnd nime den knopf, unnd zeuch den unndtersich, unnd setz ime an mit deinem schwerrt, wa du willt.