Vier ansetzen.
Gee rasch in ine, Unnd setz im an sein gesicht, Oder ann hals, Oder an seinn prust, Oder unnder sein linckh ÿgsen.
Hat er dir an prust anngesetzt.
Hat er dir in die prust angesetzt, mit seinem schwert, so var mit der linnckhenn hannt, von oben nider, auf sein schwert, unnd halt das vesst beÿ dem ort, unnd stich denn mit deinem schwert hinnter sein linnckhs pain, unnd scheub mit deiner brust ein wennig fur dich, Unnd zuckh deinnen leib palt aus seinem ort, Unnd stos in mit deinner linnckhen hannt under sein gesicht, oder an sein prust, hinntersich ÿber dein schwert.
Ein ander Bruch.
Hat er dir aber an gesetzt unnd du im auch, so stich mit deinnem schwert, hinter seinen hanntschuch, und lauf fur dich auf sein linckhe seitn.
