Nÿmb das schwert, mit der rechten hannt, beÿ dem pinnt, unnd mit der linkchen greif mitten in die clingen, und gee vasst inn man, So mues er stechen oder schlagen, doch kumb vor, pis rasch, greif ferlich, unnd bleib ~ nahenndt.
Das erst stuckh:~
Stich im innwenndig zu seinem gesicht, wert er dir das, so far durch, unnd setz im auswenndig in sein gsicht, wert er dir das furpas, unnd streicht dir den ort ab, So winnt mit deinem knopf ime, yber sein rechte agsl, unnd spring mit dem rechtn pain, hinter sein linckhs, unnd wirf in ÿberruckhs.
Der bruch
Hat er dir den knopf also an den hals geworffen, So var mit der linnckhen hannt, von unnten auf, zwischen seinen baiden armen, und begreif in peÿ seinem rechtn arm, unnd schwing dich von im auf dein recht seittn, und wirf in ÿber die huf.
hernach gemalt Stuck und pruch.
