Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/393

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

Merck wann dich einer vorwerths zů Rung will angreiffen / so hab acht mit welchem Arm er dich am ersten ergreiffen wil / denselbigen Arm ergreiffe im mit vmb gewundenem arm starck / mit der andern hand aber greiff in die Mauß des andern Arms / vnd truck mit derselbigen von dir / wie du solches in der Figur F. an den obern bossen zůr Rechten hand sehen kanst.

Merck wann dich einer ergreifft bey deinen Achseln oder Armen / so schlag mit beiden henden vnden auff / vnnd trenne jhm die Arm / fall jhm demnach behend mit gebucktem leib in die bein / vnd zeuch an dich so felt er.

Item merck in was Ringen dich einer an wil greiffen / so schauw in dem er her greifft / so thu beide feust hart zů / vnd stell die an beide seiten brust / vnd stoß mit den Elenbogen von dir vmb dich / so schwingest dich ledig / greiff jhn behend an nach deinem vortheil.

Merck so du einen in der eyl ergreiffst bey der hand / so ruck jhn zů dir / vnd fahr im mit der andern hand vmb den hals / das dein hand widerumb an dein Brust kom / vnd faß dein kleit zwing in hart zů dir / so hastu in gefangen / wie du solches an den mitlern vndern bossen in der Figur F. sehen kanst.

Ergreiffestu ein bei seiner Rechten hand / schwing in auff / vnd gehe vnder seim Arm durch / vnd trit mit deinem Rechten zwischen sein beide bein / vnd greiff mit deiner rechten Hand aussen vmb sein bein / ziehe sein rechten Arm wol zů dir vber deine Achsel / vnd heb vbersich / vnd wirff nach deinem gefallen.