Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/31

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

gefochten werde theils alhie mit dem Schwerdt / vn aber bißher in den zweyen vorgehenden Capiteln / von beiden stucken gnusamer bericht geschehen / so erfordert alhie ferner die ordnug / das auch von dem dritten theil vnd stuck erklerung gethan werde / welches ist auff was weiß alles Fechten soll volbracht werden / das den fúrnemlich beschicht durch drey stuck / den Anfang das Mittel vnd Endt wie oben angezeigt. Demnach aber der Anfang durch zweyerley vnderschiedlich stuck sol vnd muß gemacht werden / nemlich auß vnd von den Legern / als auß dem die hauw ihren anfang nemen / sagen / wie vil seind erzehlen / vn wie sie volnbracht sollen werden / erkleren. Die Hůt oder Leger aber seind ein zierlich / aber doch nothwendig / stellung vnd geberd des gantzen leibs mit dem Schwerdt / in welche sich der Fechter so er / wie offt geschicht / ehe den sein gegenpart zů jhm kompt auff den platz / stellet vnd Legert / damit er nit vnversehens von im vbereilt vn verletzt / sonder er in hierauß erwarten in acht haben / vn alsbald er zů im kompt / mit vortheil vn gewisser geschwindigkeit angreiffen vn zůhauwen / vnd sich also gegen seinem widerpart Legern / das er ohn schaden zů jhm nit einhauwen köne / sondern entweders / so er nach seiner Blósse arbeitte / sich bloß geben müsse / vn er jhm also die vermeinte zůhabne Blóß mit einem zů oder abtritt entziehen / oder jhm auff das wenigst so er auß seinem vortheil hiedurch gereitzet / sein Kling außnemen / in verhindern / vnd ihn in seiner arbeit stecken köne. Die Leger oder Hůten aber / haben wie dan auch droben bemelt ihren vrsprung auß der theilung des Mans / den wie der Man in vier quatier Ober / Vnder / Recht vn Linck getheilt / so seind der Blóssen auch vier darauff der gegenfechter fúrnemlich zůtreffen / vnd wie vier Blósse / also seind auch gleichfals viereley Hauptleger oder Hůtten / darauß die andern alle herkommen vnd entspringen / als der Ochs / Pflug / Tag / vn Olber / die andern aber so hierauß entstehn / seind Zornhůt / Langort / Wechsel / Nebenhůt / Eisenport / Hengetort / Schlüssel / Einhorn / davon denn ordenlich vnd kurtzlich soll gehandelt werden.