schaitelhaw.
Nun merkh nu die stuckh.
das erst seind die vier huet,
Das ander die vier verseczen.
Das drit die nachraisen.
Das viert die überlauffen.
Das fünfft die abseczen.
Das sechst des durchwegsell,
Das sibent das zuckhen,
Das Acht das durchlauffen.
Das Neunt das abschneiden,
Das zehent das henndtruckhen.
Das Ailfft seind die hengen.
Das zwelfft das send die winden.
vnnd was du nun auß den stucken vechten solt, vnnd wie du dich mit den heng(en) vnd pinden ploß solt geben. das wirstu nach ainander hernach finden.
Text
Höre was da schlecht ist
vicht nit oben. linckh so du recht bist.
vnd ob du linckh bist
im vechten auch seer hinckhest.
Glosa Das ist ler vund trifft zwen ain ainen rechten vnd ainen lincken. vnd ist wie du solt hawen. das man dir die schwech in dem schwert in dem ersten haw nit angewong. vnd das vernym also, wenn du mit dem zu vechten zu Im kumbst pistu recht so hau mit namen den ersten haw nit von der lingken seitten, wann Er ist schwach. und magst damit nit wider halten. wann Er mit dir starkh ein hauet. darumb so haw von der rechten seitten. so magst wol starckh wider halten. vnd Im schwert arbaiten wastu wilt. Desgeleichen bistu lingkh. so haw den ersten hau von der lingken seitten. wann es ist einem rechten gar wild kunst zutreiben von der lingkhem, seitten. deßgleichen ist auch einem linckhen von der rechten seite.
Text
Vor und nach die zway ding.
seind aller kunst ein vrsprung.
schwech vnd sterckh,
ynndes das wort mit merkh.
so magstu lern
mit kunst arbaiten. vnnd wern.
erschrickhstu gern.
kain vechten ny mer lern.
Glosa. Das ist. das du vor allen sachen solt recht ver/nemen, die zway ding vor vnd nach. vnd darnach schwech vnnd sterckh des schwerts. vnd das wort Inndes vnd darauß. kumbt der gancz grundt. aller kunst des vechtens. wann du die dinng recht vernymbst. vnd vorauß das wort Inndes nit vergist in all(en) stücken die du treibst. so bistu wol ain gutter maister, ~
Hie merckh was da haist das wort ynndes
wenn du eekumbst mit
