vnd streich im mitt der halben Schneid von vnden über eck durch das gesicht los also die zwirch noch der lincken Seiten ablauffen Hauw im noch dem rechten kney
bruch auff den ochsen
Trütt vnd hauw von deiner rechten Seiten von vnden sin wer vom lincken arm weck mitt deiner langenn Schneid den andern Streich thu auch in sein linck Seitten Mer thritt in den zwen Streichen wol vmb sein linck Seiten ·;·
Bruch auff den eber
Itẽ stich von deiner lincken Seitten im zugang behend über dein hand noch seiner brust, So bald er wil versetzen So zuck vmb den kopff vnd hauw im zum rechten arm in dem streich trit wol auff Sein Rechte Seiten in sprungs weis
Merck düse vorgeschrübne brüch auff die leger must behend machen als bald du in im leger ergreiffst eb er sich zu seim vürgenumen stuck ermant. wo du das vor nit beghelst So magstu zu den brichen nit wol kumen als wan du in im leger ergreüffst
