Zway einnprechen mit Iren Schillten
Item halt dich also Mit disem szuck wann Ir zusamen gond stannd mit deinem rechten fuoß vor unnd hallt dein Schwert mit deiner rechten hand In deinem hefft den Ort gestrackts gogen dem man deinen schildt inn deiner Lincken hand vor deinem Leib Indes volg mit deinem lincken Schenkel hinnach unnd wind Im deinen Ort deines schwerts Mit ainem Stich zu seinem Fisier. stat er dann dann auch mit seinem lincken fuoß gögen dir und hatt seinen Schildt Inn baiden hennden unnd nimpt dir deinen stich damit hinweck so laß dein Schwert fallen und greiff mit deiner rechten hand zu deiner lincken In deinen Schildt unnd stich Im deinen vordern Spitz zu seinem Fisier. Sticht er dir also zu so nimb Im das ab mitten in deinen Schildt unnd stich Im deine vordere Spitz zu seinem Fisier truck in damit starck von dir. hat er dir also angesetzt unnd truckt dich mit gewallt vom Im so laß deinen Schildt fallen Indes greiff mit deiner rechten hand In seinen Schildt und mit deiner lincken vornen umb seinen Leib hinumb under sein rechte Schlin truckt In damit zu dir. Indem laß dein rechte hand gon von seinem Schildt greiff damit zu deinem Dolchen und Stich Im zu seinem Fisier sohastu Im all sein arbait prochen
