Einn ansezen gögen ainem Mordschlag
Item hallt dich also mit Disem stückh wann Ir mit den spiessen zusammen geschossen hand unnd baid daruon kumen sennd stand mit deinem lincken fuoß vor unnd halt dein schwert mit deinner rechten hand Inn deinem hefft auf deiner rechten seitten die linnckh mitten Inn deinner klingen Indes wind Im deinen Ort mit ainem stich zu seinem hals windt Er dir also ein unnd du auch mit deinnem rechten fuoß gögen Im steest so nimb Im das ab mit deinem schildt Inndem laß deinen schildt fallen unnd verwechsel baid hend Inn dein klingen unnd schlag Im ainen Mordschlag mit knopff unnd kreyz nach seinem haupt Schlecht er dir also zu so far auf mit deinem schildt nimb Im damit seinen schlag hinweckh unnd laß deinen schildt fallen Indes verwechsel dein rechte hand auß deinem hefft zu deiner lincken Inn dein klingen unnd volg mit deinem rechten schennckel hinach unnd schlag Im ainen Mordschlag mit knopff unnd kreiz nach seinem furgesezten schennckel wind dich damit zwifach von Im zurückh
