·M·erck in die vierd hu°t zw champf schick dich also Halt dein swert mit der rechten hant pey der hanthab vnd mit der lincken greif mitten in die klingen vnd hald es vnder deinem rechten vchsen vnd setz das ain gehültz vorñ vast an die prust vnd halt den ort gegen dem mann ~
Merck ein güte ler
Wiss in die vierd hu°t soltu chömen aus allen anderñ hu°ten mit an setzen Das vernÿm also wenn dw Im aus einer hu°t zw stichst Ist denn sach das du ÿm recht triffst das dein ort haft in dem harnasch So wind als pald das gehültz an dein prust In die hu°t vnd dring yn also vor dir hÿn vnd lass ÿn von dem ort nicht abchömen So mag er wider nicht gestechen noch geslachen ~
Das Ist aber ein ler
Merck alles das dw an setzen wild das setz in das gesicht ad oder an den hals oder an sein lincke achsel oder vnder sein lincks vchsen vnd wenn dw Im hast an gesetzt so merck ist er lenger wenn dw pist So tring yn also vor dir hÿn vnd wart das dein ort vbersich auf get vnd ym in die ring wol gesetzt seÿ
Oder ist er kurtzer wenn dw so lass dein swert mit der hant vnder sich absincken pis auf dein rechte hüff vnd das dein ort vbersich stee vnd ÿm in den harnasch wol gesetzt sey vnd dring
